Ադրբեջանում կրկին հիստերիայի մեջ են․ ԱԳՆ-ի էմոցիոնալ հայտարարությունը

«Հայաստանը, որը չի կարողանում հաշտվել Ադրբեջանի Հանրապետության կողմից իր սահմանները վերահսկելու և հայկական սադրանքները կանխելու համար ստեղծված Լաչինի սահմանային անցակետի գործունեության հետ, մեքենաների շարասյուներ է ուղարկել Ադրբեջանի ինքնիշխան տարածք՝ առանց մեր կողմի հետ համաձայնեցնելու»։ Այս մասին հայտարարել է Ադրբեջանի ԱԳՆ-ն։ Տարածված հաղորդագրության մեջ նշվում է, թե միջազգային տասնյակ դեսպանների աչքի առաջ ցուցադրված հումանիտար բեռը «պատրվակ է»՝  ոտնձգություն կատարելու Ադրբեջանի կեղծ տարածքային ամբողջականության և ինքնիշխանության նկատմամբ:

Հայտարարության մեջ մասնավորապես ասվում է. 

«Մոսկվայում բանակցություններից անմիջապես հետո հայկական կողմի նման գործողությունները, ներառյալ ներկա իրավիճակի հետ կապված մանրամասն քննարկումները, վկայում են գործընթացում այս երկրի անազնվության, իրավիճակը սրելու և միջազգային հանրությանը մոլորեցնելու մտադրության մասին։ 

Այս սադրանքը ևս մեկ անգամ ցույց է տալիս, որ Հայաստանի պնդումները «տարածաշրջանում հումանիտար լարված իրավիճակի» մասին ոչ այլ ինչ են, քան մանիպուլյացիաներ և անօրինական գործունեությունը շարունակելու մտադրություն»։

Բաքվի արտաքին քաղաքական գերատեսչությունը նաև շարունակել է կեղծ հայտարարությունն այն մասին, թե ադրբեջանական կողմը, հայ բնակիչների կարիքները հոգալու համար, առաջ է քաշել մի շարք առաջարկներ, որոնց, իբր, աջակցում են Եվրամիության և Կարմիր խաչի միջազգային կոմիտեին, այդ թվում՝ Աղդամ-Ստեփանակերտ ճանապարհի օգտագործումը և այլն։

Նշվում է, որ Հայաստանը դեմ է բոլոր այլընտրանքային առաջարկներին և ինքնուրույն խոչընդոտում է համապատասխան մարդասիրական գործունեությանը։

Ադրբեջանի ԱԳՆ-ն հումանիտար բեռների տեղափոխումը սովամահության մատնված հազարավոր բնակիչների համար անվանել է  «քաղաքական շանտաժ» ու հավելել, որ Հայաստանի «սադրանքում գործիքի են վերածվել նաև Հայաստանում Եվրամիության առաքելությունը և դիվանագիտական կորպուսը»: