Սմարթֆոնները պետք է արգելվեն դպրոցներում․ ՅՈՒՆԵՍԿՕ-ի կոչը

Սմարթֆոնները պետք է արգելվեն դպրոցներում՝ դասապրոցեսի ընթացքում առաջացող խնդիրները վերացնելու, ուսուցումը բարելավելու և երեխաներին կիբերհարձակումներից պաշտպանելու համար, ասվում է ՄԱԿ-ի զեկույցում: Այս մասին հայտնում է The Guardian-ը:

ՄԱԿ-ի կրթության, գիտության և մշակույթի գործակալության՝ ՅՈՒՆԵՍԿՕ-ի պնդմամբ՝ ապացույցներ կան, որ բջջային հեռախոսի չափից ավելի օգտագործումը կապված է կրթական արդյունավետության նվազման հետ, և որ դա բացասաբար է անդրադառնում երեխաների հուզական կայունության վրա:

Ըստ ՅՈՒՆԵՍԿՕ-ի՝ սմարթֆոնների արգելման կոչը հստակ ուղերձ է առ այն, որ թվային տեխնոլոգիաները որպես ամբողջություն, ներառյալ արհեստական բանականությունը, միշտ պետք է ենթարկվեն կրթության «մարդակենտրոն տեսլականին» և երբեք չփոխարինեն ուսուցիչների հետ առերես շփումը:

ՅՈՒՆԵՍԿՕ-ն համապատասխան քաղաքականություն մշակողներին նախազգուշացրել է թվային տեխնոլոգիաների չմտածված ընդգրկման առնչությամբ՝ պնդելով, որ դրա դրական ազդեցությունը ուսման արդյունքների և տնտեսական արդյունավետության վրա կարող է գերագնահատվել, և միշտ չէ, որ նորը նշանակում է ավելի լավը:

«Ոչ բոլոր փոփոխություններն են առաջընթաց: Այն, որ ինչ-որ բան կարելի է անել, չի նշանակում, որ դա պետք է արվի»,- ասվում է զեկույցում:

«Թվային հեղափոխությունն ահռելի ներուժ ունի, սակայն ուշադրություն պետք է դարձնել կրթության մեջ այն օգտագործելու ձևին», - ասել է ՅՈՒՆԵՍԿՕ-ի գլխավոր տնօրեն Օդրի Ազուլեն:

Աշակերտների կողմից թվային տեխնոլոգիաների չափից ավելի կամ ոչ պատշաճ օգտագործումը դասարանում և տանը, լինի դա սմարթֆոն, պլանշետ կամ նոութբուք, կարող է շեղել, խանգարել և վնասակար ազդեցություն ունենալ ուսման վրա, ասվում է զեկույցում: Դրանում մեջբերվել են միջազգային գնահատման մեծածավալ տվյալներ, որոնք ցույց են տալիս «բացասական կապը» թվային տեխնոլոգիաների չափից ավելի օգտագործման և ուսանողների կատարողականի միջև:

Հիմնվելով աշխարհի 200 կրթական համակարգերի վերլուծության վրա՝ ՅՈՒՆԵՍԿՕ-ն գնահատել է, որ յուրաքանչյուր վեցերորդ երկիր արգելել է սմարթֆոնները դպրոցում: Դրանց թվում են Ֆրանսիան և Նիդեռլանդները։

Այս ամիս հայտարարելով արգելքի մասին՝ Նիդեռլանդների կրթության նախարար Ռոբերթ Դեյկգրաֆն ասել է. «Ուսանողները պետք է կարողանան կենտրոնանալ և լավ սովորելու հնարավորություն ունենան, մինչդեռ բջջային հեռախոսները խանգարում են, ինչի մասին վկայում են գիտական հետազոտությունները։ Մենք պետք է պաշտպանենք ուսանողներին սրանից»: