Ադրբեջանցիները շարունակում են մնալ Տեղում առաջխաղացած դիրքերում․ Փաշինյան
Տեղ գյուղում իրավիճակը չի փոխվել, ադրբեջանցիները առաջխաղացած դիրքերում են։ Այս մասին այսօր՝ հուլիսի 25-ին, մամուլի ասուլիսի ժամանակ ասաց վարչապետ Նիկոլ Փաշինյանը՝ պատասխանելով լրագրողի ճշտող հարցին։
Ավելի վաղ լրագրողի դիտարկմանն ի պատասխան Փաշինյանն ասաց, որ Արցախի ֆինասավորումը լծակ չէ, ուղղակի իրողություն է, որը պետք չէ մոռանալ։
«Ինչքան անհրաժեշտ լինի, մենք կանգնած ենք Լեռնային Ղարաբաղի մեր քույրերի և եղբայրների կողքին։ Անկեղծ թող մեկն ասի՝ ի՞նչ ենք խնայել։
Խոսում ենք ինքնորոշումից, եթե պարզվի մեր դիրքորոշումն է ճիշտ, աշխարհում պետություն չի մնա։ Սա պարզ հարց չէ։ Ասում են՝ այսպես պետք է լիներ, հա պետք է լիներ, մինչև 2018 թվականը թող լիներ։ Ասում են՝ չլիներ հեղափոխությունը, դա կլիներ, լավ, թող հեղափոխությունից չորս օր առաջ ԱԺ ամբիոնից չհնչեր՝ բանակցային գործընթացը կանգնած է, լավատեսություն չկա, Ադրբեջանի ակնկալիքներն անիրատեսական են։ Վարդան Օսկանյանին ի՞նչն էր խանգարում իր ասածներն անել, հիմա էլ բառախաղերի մեջ է», - ասաց վարչապետը։
