ՏԵՍԱՆՅՈՒԹ․ Ղրիմում 11 անօդաչու թռչող սարք են խոցել ու ճնշել․ սկսվել է գյուղերի բնակչության տարհանում
ԱԹՍ-ների ինտենսիվ հարձակումից հետո Ղրիմի Հանրապետությունում սկսվել է գյուղերի բնակչության տարհանումը։ Այս մասին հայտարարել է հանրապետության ղեկավար Սերգեյ Ակսյոնովը։
«Ջանկոյի շրջանում տեղի ունեցած միջադեպից հետո (ուկրաինական ԱԹՍ-ների բեկորներն ընկել են շրջանի զինամթերքի պահեստի վրա-խմբ․) որոշում է կայացվել 5 կիլոմետր շառավղով մոտակա գյուղերի բնակչությանը տարհանելու մասին»,- տելեգրամյան իր ալիքում գրել է Ակսյոնովը։
Նա նշել է, որ մարդկանց տեղավորելու են ժամանակավոր կացարաններում։
Հարձակման հետևանքով ոչ ոք չի տուժել, հավելել է Ղրիմի ղեկավարը։
Նշենք՝ Ղրիմի ղեկավար Սերգեյ Ակսյոնովը հայտնել էր նաև, որ հակաօդային պաշտպանության ու ռադիոէլեկտրոնային պայքարի ուժերը Ղրիմի օդային տարածքում խոցել ու ճնշել են 11 անօդաչու թռչող սարք, դրանց բեկորները վնասել են առանձնատուն։
Նրա խոսքով՝ բոլոր համապատասխան գերատեսչությունները տեղում աշխատում են։ Ղրիմի ղեկավարը բնակիչներին հորդորել է հանգստություն պահպանել ու վստահել միայն պաշտոնական տեղեկատվության աղբյուրներին։
