Մարգարիտա Սիմոնյանի և Սոբչակի դեմ մահափորձի գործով ձերբակալվածների մեջ անչափահասներ ու դպրոցական կա

Մարգարիտա Սիմոնյանի և Քսենիա Սոբչակի դեմ մահափորձ նախապատրաստելու գործով մեղադրյալներին մեղադրանք է առաջադրվել ասիական արտաքինով մարդկանց ծեծի ենթարկելու համար։ Այս մասին գրում է ՏԱՍՍ-ը, նշելով, որ այս մասին ասվում է մեղադրյալներից մեկի կալանավորման վերաբերյալ Բասմանի դատարանի որոշման մեջ, որում մասնավորապես նշված է.

«Սույն քրեական գործը հարուցվել է 2023 թվականի հուլիսի 14-ին, ՌԴ Քննչական կոմիտեի գլխավոր քննչական վարչությունում ութ անձի նկատմամբ՝ 213-րդ հոդվածի 2-րդ մասով նախատեսված երեք հանցագործության հատկանիշներով (խուլիգանություն, որը կատարվել է մի խումբ անձանց կողմից նախնական համաձայնությամբ)՝ ասիական ազգության անձանց խուլիգանական դրդապատճառներով ծեծի ենթարկելու փաստերով»։

Նշվում է, որ բոլոր ութ անձինք բերման են ենթարկվել հուլիսի 14-ից 17-ն ընկած ժամանակահատվածում, նրանց արդեն մեղադրանք է առաջադրվել։

Նրանց թվում կան նաև անչափահասներ, որոնցից մեկը Մոսկվայի միջնակարգ դպրոցի 10-րդ դասարանի աշակերտ է։

Դատարանում պաշտպանական կողմը հայտարարել է, որ մեղադրյալը պատրաստ է համագործակցել հետաքննության հետ և չի պատրաստվում թաքնվել, ինչի հիման վրա փաստաբանը խնդրել է այդ դեռահասին տնային կալանքի տակ առնել։ Դատարանը, սակայն, մեղադրյալին ուղարկել է քննչական մեկուսարան։

Հիշեցնենք՝ հուլիսի 15-ին Անվտանգության դաշնային ծառայությունը կանխել էր RT հեռուստաալիքի գլխավոր խմբագիր Մարգարիտա Սիմոնյանի և լրագրող Քսենյա Սոբչակի դեմ նախապատրաստված մահափորձը: