Հայտնի է՝ երբ կլինի Թրամփի դատավարությունը
Միացյալ Նահանգների նախկին նախագահ Դոնալդ Թրամփի կողմից գաղտնի փաստաթղթերի հետ ոչ պատշաճ վարվելու գործով դատավարությունը նշանակվել է 2024 թվականի կեսերին։ Այս մասին գրել է CNBC-ն։
«Երդվյալ ատենակալների ընտրության գործընթացը նշանակված է մայիսի 14-ին, դատավարությունը կսկսի մայիսի 20-ին»,- ասվում է Ֆլորիդայի Հարավային շրջանի դաշնային դատարանի որոշման մեջ, որը հրապարակվել է այսօր:
ԱՄՆ Հետաքննությունների դաշնային բյուրոյի աշխատակիցները 2022 թվականի օգոստոսին Ֆլորիդայում Թրամփի Մար-ա-Լագոյի կալվածքում տեղի ունեցած խուզարկության ժամանակ առգրավել էին ընդհանուր առմամբ 102 փաստաթուղթ, որոնցից 27-ը եղել են ամերիկյան վարչակազմի նախկին ղեկավարի աշխատասենյակում, ևս 75-ը՝ մառանում։ 17-ը եղել է «Հույժ գաղտնի» դրոշմի ներքո։
Հանրապետական Թրամփը պնդում է, որ իր կողմից ոչ մի ապօրինություն չի եղել, քանի որ ինքը՝ որպես պետության ղեկավար, իրավասու է գաղտնազերծել իր ունեցած բոլոր փաստաթղթերը։ Նախկին նախագահն իրեն առաջադրված մեղադրանքը բնութագրում է որպես զուտ քաղաքական որոշում ԱՄՆ ներկայիս վարչակազմից՝ դեմոկրատ Ջո Բայդենի գլխավորությամբ։
ԱՄՆ Հանրապետական կուսակցության այլ հայտնի գործիչներ նույնպես Բայդենի վարչակազմին մեղադրում են գործը քաղաքականացնելու մեջ։
