ՏԵՍԱՆՅՈՒԹ․ Մանրամասներ՝ Երևանի շենքերից մեկում բռնկված հրդեհից․ մարդկանց տարհանել են
ՀՀ ՆԳՆ փրկարար ծառայությունը տեղեկացնում է, որ Երևանի կենտրոնում բռնկված հրդեհը մարելու համար դեպքի վայր են մեկնել 3 մարտական հաշվարկ, ավտոսանդուղք, օպերատիվ խմբեր։
Հուլիսի 20-ին, ժամը 22:11-ին Ճգնաժամային կառավարման ազգային կենտրոն ահազանգ է ստացվել, որ Երևանի Անտոն Քոչինյան փողոցում գտնվող շենքերից մեկի տանիքից ծուխ է նկատվում:Հայտնում են ՀՀ ՆԳՆ փրկարար ծառայությունից:
Դեպքի վայր են մեկնել ՆԳՆ ՓԾ Երևան քաղաքի փրկարարական վարչության հրշեջ-փրկարարական ջոկատներից երեք մարտական հաշվարկ, ավտոսանդուղք, Ճգնաժամային կառավարման ազգային կենտրոնի և Հրդեհաշիջման և փրկարարական աշխատանքների կազմակերպման բաժնի օպերատիվ խմբերը:
Auroranews.am-ի հետ զրույցում ականատեսներից մեկը նշել է, որ շենքի բնակիչները տարհանվել են։ Կրակն արդեն մարել են։ Տեղում է նաև շտապօգնության մեքենա։
Ավելի վաղ հայտնել էինք, որ հրդեհ է բռնկվել Երևանի նորակառույց շենքերից մեկում։
