Փաշինյանին Լարսի հարցով տված խոստումներն իրականացրել ենք․ ՌԴ վարչապետ

Վերին Լարսում բացարձակ ռեկորդ է սահմանվել. հունիսին անցել է 31 622 բեռնատար, այս մասին ՌԴ վարչապետ Միխայիլ Միշուստինի հետ հանդիպմանը հայտարարել է Դաշնային մաքսային ծառայության ղեկավարի պաշտոնակատար Ռուսլան Դավիդովը։

Նա նշել է, որ տեմպը պահպանվում է, հուլիսին հերթեր չկան։

«Սա և՛ մեր գերատեսչությունների, և՛ գործընկերների համատեղ հսկայական աշխատանքն է։ Մեր հայ գործընկերները նաև օգնում են մեզ համակարգել մեր աշխատանքը վրացի գործընկերների հետ, որոնց հետ, մասնավորապես, պայմանավորվում ենք, թե ինչպես մեքենաները միմյանց հանձնել հսկողության»,- ասել է Դավիդովը։

ՌԴ վարչապետը նման փոխգործակցությունը «առողջ համագործակցություն» է որակել։

«Առողջ համագործակցություն է։ Առաջին հերթին պետք է մտածել այն մարդկանց մասին, որոնք տուժում են, եթե նման մեխանիզմները չեն գործում․ նրանք հերթ են կանգնում, իսկ ձեռնարկատերերը գումար են կորցնում», - հավելել է ՌԴ վարչապետը։

Նա հիշեցրել է, որ հունիսի 7-ին Սոչիում ՀՀ վարչապետ Նիկոլ Փաշինյանն այս թեմայի վերաբերյալ մտահոգություն էր հայտնել, իսկ իրենք խոստումներ էին տվել, որոնք կատարվել են։

Հիշեցնենք՝ հունիսի 22-ի կառավարության նիստում վարչապետ Նիկոլ Փաշինյանն ասել էր, որ Վերին Լարսի անցակետի հետ կապված Հայաստանի ու Ռուսաստանի միջև երկարատև խոսակցությունը բերել է կոնկրետ ադյունքի։