Թուրքիային վերաբերող գաղտնի փաստաթղթի արտահոսք է եղել Պենտագոնից. պատճառը հայտնի է
Թուրքական մամուլում լայնորեն շրջանառվող տեղեկությունների համաձայն՝ ԱՄՆ-ի պաշտպանական գերատեսչությանը՝ Պենտագոնին պատկանող մի շարք ռազմական գաղտնի փաղթաթղթերի արտահոսք է եղել։ Այս մասին գրում է Ermenihaber-ը։
Նշվում է, որ այդ փաստաթղթերի մեջ եղել է նաև Թուրքիայի կողմից «հրատապ» մակագրությամբ ԱՄՆ-ին ուղարկված դիվանագիտական նամակ:
Ըստ պնդումների՝ նամակում տեղ է գտել այնպիսի տեղեկություն, որը կապված է Թուրքիայում ահաբեկչական համարվող «Քուրդիստանի բանվորական կուսակցության» (ՔԲԿ-PKK) կողմից ԱՄՆ-ում ծրագրվող հնարավոր գործողությունների մասին:
Կայքը նշում է, որ արտահոսքի պատճառ է հանդիսացել ԱՄՆ-ի հատուկ ծառայության աշխատակիցներից մեկի տառասխալը, որի հետևանքով էլ էլեկտրոնային նամակը ճիշտ հասցեին ուղարկվելու փոխարեն, այլ տեղ է հասցեագրվել:
Թուրքական մամուլի պնդմամբ՝ սա գաղտնի փաստաթղթերի արտահոսքի առաջին դեպքը չէ: Միայն այս տարվա հունվարից ի վեր Պենտագոնի աշխատակիցների անփութության հետևանքով գաղտնի փաստաթղթեր պարունակող շուրջ 117.000 էլեկտրոնային նամակ ուղարկվել է սխալ հասցեների:
