G7–ի երաշխիքները Ուկրաինային ոտնձգություն կլինեն ՌԴ–ի անվտանգության համար. Պեսկով
Ուկրաինային G7–ի երկրների կողմից անվտանգության երաշխիքների տրամադրումը ոտնձգություն կլինի ՌԴ–ի անվտանգությանը և հղի է կարճաժամկետ հեռանկարում բավական բացասական հետևանքներով։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը։ Նրա խոսքերն է մեջբերում «Ինտերֆաքսը»։
«ՆԱՏՕ–ին Ուկրաինայի անդամակցության թեմային մենք շատ բացասական ենք վերաբերվում։ Այդ թեման անմիջական կապ ունի հնչած այն հայտարարությունների հետ, որ «յոթնյակի» երկրները Ուկրաինային անվտանգության երաշխիքներ կտրամադրեն։ Մենք դա սխալ և պոտենցիալ չափազանց վտանգավոր ենք համարում։ Քանի որ Ուկրաինային որևէ երաշխիք տրամադրելիս այդ երկրները փաստորեն անտեսում են անխախտելի անվտանգության միջազգային սկզբունքը։ Այսինքն, Ուկրաինային անվտանգության երաշխիքներ տրամադրելով, նրանք ոտնձգություն են իրականացնում ՌԴ–ի անվտանգության նկատմամբ։ Դա անհնար է։ Եվ դա միջնաժամկետ, երկարաժամկետ և նույնիսկ կարճաժամկետ հեռանկարում հղի է բավական բացասական հետևանքներով», – ասել է Պեսկովը։
Նրա խոսքով` Մոսկվայում լսում են «այդ երկրների որոշ քաղաքական գործիչների ձայները», որոնք հասկանում են նման որոշումների վտանգավոր լինելը։
«Հույս ունենք, որ այդ ձայները լսելի կդառնան, և իմաստություն կցուցաբերվի։ Այլապես, նման որոշումներ կայացնելով, այդ երկրները փաստացի Եվրոպան շատ ավելի վտանգավոր են դարձնում երկար տարիներով։ Եվ իհարկե, նրանք վատություն են անում մեզ, ինչը մենք հաշվի կառնենք և կգործենք՝ ելնելով դրանից», – ասել է Պեսկովը։
Նշենք, որ ՆԱՏՕ–ի անդամ երկրների առաջնորդները հաստատել են Ուկրաինային բազմամյա աջակցության փաթեթը, որը բաղկացած է երեք տարրերից։ Դաշինքի գլխավոր քարտուղար Յենս Ստոլտենբերգը նշել է, որ փաթեթը ներառում է բազմամյա աջակցության ծրագիր ՆԱՏՕ–ի հետ համատեղելիության հասնելու, ՆԱՏՕ–Ուկրաինա խորհուրդ ստեղծելու և անդամակցության գծով գործողությունների ծրագրի կատարման պայմանների չեղարկման համար, ինչը անդամակցության գործընթացը երկու փուլից կկրճատի մինչև մեկ փուլ։ Գլխավոր քարտուղարի խոսքով` դաշինքի երկրների առաջնորդները հաստատել են, որ Ուկրաինան ՆԱՏՕ–ի անդամ կդառնա, երբ դաշնակիցները որոշեն, որ պայմանները պահպանված են։
