2019 թվականից ի վեր Սոչիից Թբիլիսի թռավ առաջին ինքնաթիռը

Երկար ժամանակ անց ՌԴ Սոչի քաղաքի և Թբիլիսիի միջև օդային հաղորդակցությունը վերականգնվել է: 2019 թվականից ի վեր առաջին ինքնաթիռը Սոչիի օդանավակայանից թռիչք կատարեց դեպի Վրաստան։ Այս մասին հաղորդում է Gazeta.ru-ն` հղում անելով ТАСС-ին: 

«Թռիչքը հենց նոր է իրականացվել», - հայտնել են ավիահանգույցի մամուլի ծառայությունից։

Նշվում է, որ թռիչքներն իրականացրել է Red Wings ավիաընկերությունը։ Թբիլիսիի չվերթի մեկնումն ի սկզբանե նախատեսված է եղել Մոսկվայի ժամանակով ժամը 14:00-ին, սակայն իրականացվել է ավելի ուշ: 

Հիշեցնենք, որ մայիսի 10-ին ՌԴ նախագահ Վլադիմիր Պուտինը հրամանագիր է ստորագրել, որով վերացվում է դեպի Վրաստան օդային ճանապարհորդության արգելքը, որը սահմանվել էր 2019 թվականին Թբիլիսիում հակառուսական զանգվածային ցույցերի պատճառով։ Երկրի ղեկավարը վերացրել է նաեւ Վրաստանի քաղաքացիների համար վիզային ռեժիմը, որը գործում էր 2000 թվականից։

Ավելի վաղ Թբիլիսիի քաղաքապետը կեղծավորներ էր անվանել նրանց, ովքեր դեմ են Ռուսաստանի Դաշնությունից զբոսաշրջիկների ժամանումին։