«Եվրոպան, ցավոք, բառի բոլոր իմաստներով մոտենում է աղետին». Հունգարիայի ԱԳՆ

Հունգարիայի արտաքին գործերի նախարար Պետեր Սիյարտոն համոզված է, որ Եվրոպան մոտենում է աղետի, քանի որ այնտեղ չի հանդարտվում «պատերազմական փսիխոզը»։ Նա չի ակնկալում, որ իրավիճակը կփոխվի Եվրամիության (ԵՄ) երկրների արտգործնախարարների հանդիպումից հետո, որը տեղի կունենա այսօր՝ հունիսի 26-ին, Լյուքսեմբուրգում: Այս մասին գրում է РИА Новости-ն։

«Եվրոպան, ցավոք, բառի բոլոր իմաստներով մոտենում է աղետին: Հնարավոր կլիներ կանխել էլ ավելի մեծ աղետը և փրկել հազարավոր մարդկանց կյանքեր, սակայն դրա համար անհրաժեշտ է դադարեցնել պատերազմական փսիխոզը։ Պատրանքներ չունեմ, որ դա տեղի կունենա ԵՄ ԱԳ նախարարների խորհրդի այսօրվա նիստում»,- գրել է ԱԳ նախարարը Facebook-ում:

Հունգարիայի իշխանությունները բազմիցս քննադատել են ԵՄ-ին՝ Ռուսաստանի հետ ռազմական հակամարտությունում Ուկրաինային աջակցելու համար։ 

Հիշեցնենք՝ այս շաբաթ Վաշինգտոնում տեղի է ունենալու Հայաստանի և Ադրբեջանի արտգործնախարարների՝ Արարատ Միրզոյանի և Ջեյհուն Բայրամովի հանդիպումը: