Վրաստանում բացառում են Սաակաշվիլիի վերադարձը քաղաքականություն
Վրաստանի նախկին նախագահ Միխեիլ Սաակաշվիլին չի կարողանա վերադառնա վրացական քաղաքականություն՝ Վրաստանի քաղաքացիություն չունենալու պատճառով: Այս մասին հայտնում է ТАСС-ը՝ հղում տալով երկրի արդարադատության նախարար Ռատի Բրեգաձեին։
Նախարարն այս մասին հայտարարել է լրագրողների հետ զրույցում։
«Միխայիլ Սաակաշվիլին Վրաստանի քաղաքացիություն չունի, հետևաբար, եթե նա ցանկանում է լինել վրացական քաղաքականության մեջ, պետք է ստանա Վրաստանի քաղաքացիություն»,- ասել է Բրեգաձեն՝ մեկնաբանելով Սաակաշվիլիի վերջին հայտարարությունը վրացական քաղաքականություն վերադառնալու մասին։
Արդարադատության նախարարության ղեկավարը Սաակաշվիլիին կշտամբել է նաև այն բանի համար, որ 2015 թվականին, դառնալով Ուկրաինայի Օդեսայի մարզի նահանգապետ, նա ստացել է Ուկրաինայի քաղաքացիություն՝ դրա պատճառով կորցնելով Վրաստանի քաղաքացիությունը։
«Երբ մարդը պետության ղեկավար է, ինչպես նաև գլխավոր հրամանատար, և հրաժարվում է իր երկրի քաղաքացիությունից, դառնում այլ պետության քաղաքացի և սկսում է ծառայել նրան, կարծում եմ, որ ավելի լավ կլիներ, եթե նա մնար քաղաքացի այն երկրին, որին սկսեց ծառայել»,- եզրափակել է Բրեգաձեն:
