Ռուսաստանում Բնության համաշխարհային հիմնադրամը ճանաչվել է անցանկալի կազմակերպություն

Ռուսաստանում օտարերկրյա գործակալ ճանաչված Բնության համաշխարհային հիմնադրամը (WWF) երկրում անցանկալի կազմակերպություն է ճանաչվել։ Այս մասին հայտնում է РБК-ն։ 

Ըստ Ռուսաստանի գլխավոր դատախազության՝ WWF-ն օգտագործում է բնապահպանական գործունեությունը «տնտեսական ոլորտում անվտանգության սպառնալիքներ ձևավորող նախագծեր իրականացնելու համար»։
 

«WWF-ն իրականացնում է գործողություններ՝ ուղղված Արկտիկայի արդյունաբերական զարգացման, Արկտիկայի տարածքների բնական ռեսուրսների, սահմանափակումների մշակման և օրինականացման վերաբերյալ երկրի քաղաքական կուրսի իրականացմանը խոչընդոտելուն, ինչը կարող է հիմք ծառայել Հյուսիսային ծովի երթուղու տեղափոխման համար Միացյալ Նահանգների բացառիկ տնտեսական գոտու ուղղությամբ»,- հայտարարել է ՌԴ գլխավոր դատախազությունը։ 

Նշենք, որ WWF-ն Ռուսաստանում օտարերկրյա գործակալ է ճանաչվել մարտին։
 

Գործակալության տվյալներով՝ հիմնադրամը ձևավորել է «վերահսկվող ոչ առևտրային կազմակերպությունների ցանց՝ խոշոր արդյունաբերական համալիրների համատեքստում շրջակա միջավայրի մասին տեղեկություններ հավաքելու համար», ինչպես նաև պատրաստում է «տենդենցային բնույթի գնահատումներ՝ ուղղված Ռուսաստանի տնտեսական զարգացումը սահմանափակելուն»։ 

Բացի այդ, հիմնադրամը նյութական և մեթոդական աջակցություն է ցուցաբերել օտարերկրյա գործակալների ռեգիստրում ընդգրկված կազմակերպություններին, որոնց անդամները պատասխանատվության են ենթարկվել չհամակարգված գործողություններին մասնակցելու համար, «ինչը վկայում է Ռուսաստանի ներքին գործերին միջամտության մասին»։