Ինչ է ակնկալում Միացյալ Նահանգները Չինաստանից․ Բլինքեն
ԱՄՆ-ն ակնկալում է Չինաստանի համագործակցությունը՝ ստիպելու, որ Հյուսիսային Կորեայի առաջնորդ Կիմ Չեն Ինը հրաժարվի հրթիռային փորձարկումներից և նստի բանակցությունների սեղանի շուրջ՝ լուծելու միջուկային խնդիրը։ Այս մասին CBS-ին ասել է ԱՄՆ պետքարտուղար Էնթոնի Բլինքենը:
Միաժամանակ նա նշել է, որ այդ կապակցությամբ Պեկինից ոչ մի պարտավորություն չի ստացել։
«Բայց ես կարծում եմ, որ Չինաստանը հասկանում է, որ այս տարածաշրջանում ամենաապակայունացնող խաղացողը Կիմ Չեն Ինն է՝ իր բազմակի հրթիռային փորձարկումներով և գուցե նույնիսկ յոթերորդ միջուկային փորձարկումով: Եվ ահա թե ինչ եմ ես ասել մեր չինացի գործընկերներին: Մենք ցանկանում ենք, որ նրանք համագործակցեն՝ փորձելով ստիպել Կիմ Չեն Ինին հրաժարվել այս բոլոր հրթիռային փորձարկումներից և նստել բանակցությունների սեղանի շուրջ՝ միջուկային խնդիրը, հրթիռների հարցը լուծելու համար: Բայց եթե նրանք ի վիճակի չեն կամ չեն ցանկանում օգտագործել իրենց ազդեցությունը Հյուսիսային Կորեայի հարցում, ապա մենք պետք է շարունակենք քայլեր ձեռնարկել Կորեայի, Ճապոնիայի հետ, պաշտպանելու մեզ, պաշտպանելու մեր դաշնակիցներին»,- ասել է ԱՄՆ պետքարտուղարը։
Միաժամանակ, ըստ նրա, դրանք քայլեր են, որոնք ուղղված չեն Չինաստանի դեմ, այդ թվում՝ պաշտպանական միջոցների քանակի ավելացումը։
