Ռուսաստանում անցանկալի է հայտարարվել բուլղարական «Ագորա» իրավապաշտպան խումբը
Ռուսաստանի Դաշնության գլխավոր դատախազությունը երկրում անցանկալի է հայտարարել «Ագորա» իրավապաշտպան խումբը, Интерфакс-ին հայտնել են գերատեսչության մամուլի ծառայությունում։
«Ստացված նյութերի ուսումնասիրության արդյունքների հիման վրա Ռուսաստանի Դաշնության գլխավոր դատախազությունը որոշել է Բուլղարիայի Law Sofia հիմնադրամի (Agora International Human Rights Group) գործունեությունը Ռուսաստանի Դաշնության տարածքում անցանկալի ճանաչել»,- երկուշաբթի հայտնել է Գլխավոր դատախազությունը։
Ինչպես պարզաբանել են գործակալությունից, «պարզվել է, որ կազմակերպության գործունեությունը վտանգ է ներկայացնում սահմանադրական կարգի հիմքերի և Ռուսաստանի Դաշնության անվտանգության համար»։
«Կազմակերպությունն իր գործունեության ընթացքում կենտրոնանում է Ռուսաստանում քաղաքացիների իրավունքների և ազատությունների ենթադրյալ ոտնահարման փաստերի վերհանման և տիրաժավորման վրա՝ իրավաբանական օգնություն ցուցաբերելով ընդգծված հակառուսական դիրքորոշմամբ ընդդիմադիրներին, ներառյալ ծայրահեղական ճանաչված կազմակերպությունների կողմնակիցներին»:
Որոշման մասին տեղեկությունն ուղարկվել է Ռուսաստանի արդարադատության նախարարություն՝ կազմակերպությանը համապատասխան ցուցակում ընդգրկելու համար, հայտնում է վերահսկիչ մարմինը։
