Աֆրիկյան առաջնորդների այցի օրը ռուսական զորքերը գնդակոծել են Կիևը

Ուկրաինայի ողջ տարածքում հունիսի 16-ի ցերեկը օդային տագնապ է հայտարարվել, Ուկրաինայի Զինված ուժերի ռազմաօդային ուժերը հայտնել են Կիևի և Կիևի շրջանի բալիստիկ հրթիռներով գնդակոծման մասին։ Հայտնում է meduza.io-ն:

Կիևի քաղաքապետ Վիտալի Կլիչկոն հայտնել է, որ Ուկրաինայի մայրաքաղաքի Պոդոլսկի թաղամասում պայթյուն է որոտացել։ Կիևի քաղաքային վարչակազմը զեկուցել է հակաօդային պաշտպանության աշխատանքի մասին։

Ուկրաինայի Զինված ուժերի ռազմաօդային ուժերը հայտնել են, որ, ըստ նախնական տվյալների, հակաօդային պաշտպանության ուժերը Ուկրաինայի օդում խոցել են վեց «Կինժալ» հրթիռ, վեց «Կալիբր» հրթիռ և երկու հետախուզական անօդաչու թռչող սարք։
 

Հավելենք, որ հունիսի 16-ին աֆրիկյան առաջնորդները ժամանել են Կիև՝ քննարկելու Ուկրաինայում խաղաղության առաքելությունը։ 

Պատվիրակությունը գլխավորում էր Հարավային Աֆրիկայի նախագահ Սիրիլ Ռամաֆոսան։

Reuters-ի փոխանցմամբ՝ աֆրիկյան երկրները «վստահության միջոցներ» են մշակել Մոսկվայի եւ Կիեւի միջեւ հրադադարի հաստատման համար։ 

Դրանք ներառում են, մասնավորապես, ուկրաինական տարածքներից ռուսական զորքերի դուրսբերումը, Բելառուսի տարածքում մարտավարական միջուկային զենքից հրաժարվելը, ինչպես նաև Վլադիմիր Պուտինի ձերբակալության վերաբերյալ Միջազգային քրեական դատարանի որոշման կասեցումը և պատժամիջոցների մեղմացումը։

Ակնկալվում է, որ աֆրիկյան առաջնորդների պատվիրակությունը հունիսի 17-ին կայցելի Մոսկվա՝ Վլադիմիր Պուտինի հետ բանակցությունների համար։