«Կարևոր է խաղաղ նպատակներով էկոլոգիապես մաքուր միջուկային էներգիայի զարգացումը». Փաշինյան

Հայկական կողմը վերահաստատում է անփոփոխ կառուցողական մտադրությունը խորացնել փոխադարձ հետաքրքրություն ներկայացնող բոլոր ոլորտներում փոխշահավետ համագործակցությունը՝ այս տարի Ղրղզստանի նախագահության առաջնահերթությունների իրականացման շրջանակներում։ Այսօր ԱՊՀ կառավարությունների ղեկավարների խորհրդի հերթական նիստում հայտարարել է ՀՀ վարչապետ Նիկոլ Փաշինյանը։

Նա խոսել է ԱՊՀ երկրների առջև ծառացած կարևոր խնդիրների մասին, մասնավորապես` տնտեսվարող սուբյեկտների միջև արդյունաբերական կոպերացիոն կապերի ակտիվացում, գիտաարտադրական գոտիների ձևավորում և այլն։

«Գիտելիքի ինտենսիվ նոր ճյուղերի ստեղծումը և բարձր տեխնոլոգիական արդյունաբերական ներուժի արդիականացումը հիմնական գործոնն է կայուն և նորարար տնտեսական զարգացման հասնելու համար, ինչպես նաև մեր տնտեսությունների մրցունակության բարձրացման համար անհրաժեշտ պայման»,– ասել է Փաշինյանը։

Վարչապետը խոսել է նաև գիտական և տեխնոլոգիական արագ առաջընթացի ֆոնին աստիճանաբար ավելի սրվող բնապահպանական խնդիրների մասին։ Ըստ նրա` շրջակա միջավայրի համար ռիսկերը նվազեցնելու արդյունավետ մեխանիզմների ստեղծման պահանջարկը մեծանում է:

«Հետևաբար, խաղաղ նպատակներով էկոլոգիապես մաքուր միջուկային էներգիայի զարգացումը էական նշանակություն ունի կայուն զարգացում ապահովելու և շրջակա միջավայրի վրա բացասական ազդեցությունը նվազեցնելու համար»,– շեշտել է Փաշինյանը:

Նա ընդգծել է, որ հայկական կողմն աջակցում է Ռադիացիոն իրավիճակի մոնիտորինգի նպատակով տվյալների փոխանակման ոլորտում համագործակցության համաձայնագրի ստորագրմանը։ Այն ուղղված է ոչ էներգետիկ նպատակներով, մասնավորապես՝ գիտության, բժշկության և գյուղատնտեսության ոլորտներում միջուկային տեխնոլոգիաների օգտագործման մեխանիզմների օպտիմալ մոտեցումների մշակմանը։

Հիշեցնենք` ԱՊՀ կառավարությունների ղեկավարների խորհրդի հերթական նիստն անցկացվում է Սոչիում։