ԵՄ-ն հուլիսին առաջընթաց է ակնկալում Ադրբեջանի ու Հայաստանի ղեկավարների բանակցություններում

Եվրոպական միությունը հույս ունի, որ հուլիսի 21-ին Բրյուսելում Ադրբեջանի և Հայաստանի ղեկավարների միջև կայանալիք բանակցություններում առաջընթաց կարձանագրվի:

«Բանակցություններն ու երկխոսությունը Հայաստանի և Ադրբեջանի միջև արդար և համապարփակ խաղաղության հասնելու միակ միջոցն են։ Հետևաբար, երկխոսության շարունակականությունն ու կոնկրետ արդյունքները վճռորոշ նշանակություն ունեն գործընթացի համար, և մենք ողջունում ենք Բաքվի մասնակցությունը հաջորդ հանդիպմանը, որը տեղի կունենա հուլիսի 21 - ին ԵՄ աջակցությամբ, որտեղ պետք է հետագա առաջընթացի հասնել», - նշված է ԵՄ հայտարարության մեջ։

Նշվում է, որ Եվրամիությունը ողջունում է մայիսի 14-ին Բրյուսելում ԵՄ հովանու ներքո Ադրբեջանի ու Հայաստանի միջև անցկացված խաղաղ բանակցությունները, «որոնց ընթացքում երկու կողմերը հաստատել են միմյանց ինքնիշխանության և տարածքային ամբողջականության ճանաչումը»:

«Հունիսի 1-ին Քիշնևում Ֆրանսիայի և Գերմանիայի առաջնորդների մասնակցությամբ հանդիպումը ևս մեկ անգամ ցույց տվեց նրանց հավատարմությունը գործընթացին», - նշված է հայտարարության մեջ:

Նշենք, որ հուլիսի 21-ին Բրյուսելում կկայանա, Հայաստանի, Ադրբեջանի և Եվրախորհրդի ղեկավարների եռակողմ հանդիպումը: