Դավիթ Բաբայանը` Լաչինի անցակետում այս պահին տիրող իրավիճակի մասին

Լաչինի միջանցքում տեղադրված ադրբեջանական անցակետի աշխատանքների մեջ որևէ բան չի փոխվել, պարզապես ադրբեջանական կողմն իր ուզած ձևով է ներկայացնում, ինչը բնական է:  Armenia Today-ը հետ զրույցում ասել է Արցախի նախագահի խորհրդական, երկրի նախկին ԱԳ նախարար Դավիթ Բաբայանը: 

«Այդպես էլ պետք է անեին, որ ցույց տային, իբրև այդտեղով մարդիկ ազատ անցնում են, ինչը բնական է, որ իրականությանը չի համապասխանում»,- ասել է նա՝ հավելելով, որ անցնում են միայն կարիք ունեցող մարդիկ հարազատների հետ՝ այն էլ ռուս խաղաղապահների ուղեկցությամբ:

Բաբայանի խոսքով՝ թշնամիներն ամեն ինչ արել են, որ անցակետը լինի առևանգման, բռնության, հարկ եղած դեպքում մարդկանց կալանավորելու վայր, որովհետև համապատասխան ենթակառուցվածքներն այնտեղ կան, ստեղծված են: Բայց կան մարդիկ, ովքեր կարիքի մեջ են, լուրջ խնդիրներ ունեն: «Այո՛, շատ ծանր պրոցեդուրա է, բայց եթե մարդկանց կյանքի խնդիր է՝ ի՞նչ անել»,- ասել է Բաբայանը: 

Բաբայանի խոսքով՝ տեղափոխություններն իրականացվում են երկու եղանակով՝ Կարմիր խաչ և ռուս խաղաղապահներ: Վերջիններս, ըստ նրա, պետք է միշտ այնտեղ լինեն, քանի որ ցանկացած մարդու կարող են բռնել, իսկ դա Ադրբեջանի քմահաճույքին թողնելը ճիշտ չէ: Նրանք միշտ ուղեկցող ունեն այնտեղ, ինչը զինադադարի կոպիտ խախտում է, բայց գոնե մի քանի տոկոսով կարող է հոգեբանական զսպող ազդեցություն ունենալ՝ անվտանգությունն ինչ-որ կերպ ապահովելու առումով: Արցախցի պաշտոնյան նշել է, որ կան տարբեր կատեգորիաներ, ասենք՝ ծայրաստիճան հիվանդը դիմում է Արցախի առողջապահության նախարարությանը, որն իր հերթին կառավարությանը կամ ռուս խաղաղապահներին է դիմում տեղափոխության հնարավորության համար: Մեկ ուրիշի, օրինակ, հարազատը Հայաստանում կարող է ծանր հիվանդ լինել կամ մահանալ, ինչի համար նույնպես սուր անհրաժեշտություն է առաջանում մեկնելու: 

«Բնական է, որ սա ամենօրյա ռեժիմով չի, որովհետև ամեն օր հնարավոր չէ դա անել»,- նշել է Բաբայանը: 

Մանրամասները` սկզբնաղբյուրում: