Զախարովան պատասխանել է Քըլըչդարօղլուի մեղադրանքներին

Ռուսաստանը «Արևմուտքի պես չի գործում» և չի միջամտում այլ երկրների ներքաղաքական գործընթացներին։ Այդ մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով Թուրքիայի նախագահական ընտրություններում ընդդիմադիր թեկնածու Քեմալ Քըլըչդարօղլուի հայտարարություններն այն մասին, թե, իբր Ռուսաստանը միջամտում է ընտրական գործընթացներին:

«Մենք մտադիր ենք շարունակել համակարգված աշխատանքը թուրքական կողմի հետ՝ զարգացնելու մեր հարաբերությունների ողջ շրջանակը։ Մենք կրկնում ենք, որ մենք չենք հետևում հավաքական Արևմուտքի օրինակին և չենք ձգտում միջամտել այլ պետությունների ներքին գործերին»,- ասել է նա։
 

Զախարովան ընդգծել է, որ թուրք ժողովուրդը ցույց է տվել իր նախասիրությունները ժողովրդավարական կամարտահայտման ժամանակ։ 

«Մենք հարգում ենք այս ընտրությունը»,- հավելել է ՌԴ ԱԳՆ ներկայացուցիչը։

Հիշեցնենք, որ մայիսի 28-ին Թուրքիայում կայացել է նախագահական ընտրությունների երկրորդ փուլը։ Երկրի ԿԸՀ-ն ճանաչել է Ռեջեփ Թայիփ Էրդողանի հաղթանակը։ Քվեաթերթիկների 99,43%-ի մշակման արդյունքներով նա ստացել է ձայների 52,14%-ը, իսկ ընդդիմադիր թեկնածու Քեմալ Քըլըչդարօղլուն՝ 47,86%-ը