Լավրովը Հարավաֆրիկյան Հանրապետությունում ԱՄՆ դեսպանին խորհուրդ է տվել «իմանալ իր տեղը»
Ռուսաստանի արտաքին գործերի նախարար Սերգեյ Լավրովը Հարավաֆրիկյան Հանրապետությունում ԱՄՆ դեսպանին խորհուրդ է տվել «իմանալ իր տեղը», այլ ոչ թե խցկվել ՌԴ-ի եւ Հարավային Աֆրիկայի հարաբերությունների միջեւ, գրել է «ՌԻԱ Նովոստի»-ն։
«Եթե ամերիկացի կամ անդրօվկիանոսյան, անդրծովյան մեկ այլ դեսպանի ինչ-որ բան թվացել է, ապա պետք է առհասարակ իմանալ սեփական տեղն ու չխցկվել ուրիշի գործերի մեջ։ Եթե անդրադառնանք սպառազինությունների մատակարարումների թեմային, ապա մեկ անգամ եւս կընդգծեմ. մենք երբեք չենք խախտում միջազգային նորմերը։ Իսկ ահա մեր արեւմտյան գործընկերները դրանք խախտում են. չեզոքություն հռչակելով Ուկրաինայում իրադարձությունների հանդեպ՝ այդ երկիր են ուղարկում հսկայական քանակությամբ ժամանակակից, հեռահար եւ ոչ անվտանգ սպառազինություններ, այդ թվում նաեւ նրանց համար, ովքեր կիրառում են դրանք»,- ասել է Լավրովը:
Լավրովը նշել է, որ թե՛ Հարավաֆրիկյան Հանրապետությունը, թե՛ Ռուսաստանը, ինքնիշխան պետություններ են։
«Ամերիկացի դեսպաններն, այնուամենայնիվ, ավելի լավ կլիներ զբաղվեին իրենց իմիջով օտարերկրյա հասարակությունների աչքում»,- ասել է Լավրովը։
Ավելի վաղ Հարավաֆրիկյան Հանրապետությունում ԱՄՆ դեսպան Ռուբեն Բրիգետին պնդել է, որ հանրապետությունն իբր սպառազինություններ է մատակարարում ռուսական բանակին։ Հարավաֆրիկյան Հանրապետության ԱԳՆ-ում այնուհետեւ տեղեկացրել են, որ ԱՄՆ դեսպանը գերատեսչության պաշտոնական բողոքից հետո խոստովանել է, որ չափն անցել է, եւ ներողություն է խնդրել։
