ՄԱԿ-ը դատապարտում է քաղաքացիական անձանց և ենթակառուցվածքներին հասցված հարվածները․ ՄԱԿ-ը՝ Մոսկվայի վրա հարձակման մասին
ՄԱԿ-ը դատապարտում է քաղաքացիական անձանց և ենթակառուցվածքներին հասցված հարվածները։ Այս մասին այսօր կայացած ճեպազրույցի ժամանակ ասել է կազմակերպության գլխավոր քարտուղարի պաշտոնական ներկայացուցիչ Ստեֆան Դյուժարիկը։ Այսպիսով նա պատասխանել է Մոսկվայի վրա ԱԹՍ-ների հարձակումը մեկնաբանելու խնդրանքին, գրում է РИА Новости-ն։
«Իհարկե, մենք դատապարտում ենք ցանկացած հարձակում քաղաքացիական անձանց և քաղաքացիական ենթակառուցվածքների վրա, որտեղ էլ դրանք տեղի ունենան»,-ասել է Դյուժարիկը։
Հիշեցնենք, որ Մոսկվան և Մոսկվայի մարզը երեքշաբթի վաղ առավոտյան հարձակման են ենթարկվել անօդաչու թռչող սարքերով։ Արդյունքում մի քանի շինություններ վնասվել են։ Իշխանությունների տվյալներով՝ ոչ ոք հոսպիտալացման կարիք չի ունեցել, անօդաչու սարքերի վնասած շենքերի որոշ բնակիչներ տարհանվել են, մինչ արտակարգ ծառայություններն աշխատել են։ Պաշտպանության նախարարությունը հայտնել է, որ հարձակման հետևում կանգնած է Կիևի ռեժիմը:
