F-16-ի մատակարարումները Ուկրաինային կօգնեն երկարաժամկետ հեռանկարում․ Պենտագոն

ԱՄՆ Պաշտպանության նախարարության խոսնակ Փեթ Ռայդերը ասել է, որ ուսուցումը և F-16 կործանիչների ցանկացած հնարավոր տեղափոխումը Ուկրաինա նախատեսված է նրա միջնաժամկետ և երկարաժամկետ պաշտպանության կարիքները բավարարելու համար, այլ ոչ թե կարճաժամկետ օգտագործման համար: 

«Ուկրաինայի համար F-16-երը երկարաժամկետ պարտավորություն են Ուկրաինային»,- ասել է Ռայդերը՝ հավելելով, որ ինքնաթիռները շուտով չեն ներգրավվի մարտերում: 

Նա նաև հաստատել է, որ Միացյալ Նահանգները կմասնակցի ուկրաինացի օդաչուների վերապատրաստմանը եվրոպական երկրներից դուրս, «բայց (...) երբ կսկսվի այդ ուսուցումը, ինչպես կմատակարարվեն ինքնաթիռները, ով կտա նրանց, մենք շարունակում ենք աշխատել մեր միջազգային գործընկերների հետ այս հարցերի շուրջ»։ 

Նա ասել է, որ մարզումները կարող են սկսվել առաջիկա մի քանի շաբաթների կամ ամիսների ընթացքում: 

Պենտագոնի խոսնակն ասել է, որ ապրիլին Ուկրաինայի պաշտպանության կոնտակտային խմբի վերջին հանդիպման ժամանակ ԱՄՆ ռազմական գերատեսչության ղեկավար Լլոյդ Օսթինը «մի քանի խնդրանք է ստացել այն երկրներից, որոնք ԱՄՆ-ից թույլտվություն են պահանջում՝ պատրաստելու ուկրաինացի օդաչուներին»: Դրանից հետո այս հարցը քննարկվել է ԱՄՆ Ազգային անվտանգության խորհրդում։ 

«Միաձայն համաձայնություն կար, որ դա պետք է արվի, և որ մենք աջակցության կարիք ունենք», - եզրափակեց Ռայդերը: 

Ընդ որում, չեն բացահայտվում ոչ F-16-երի թիվը, ոչ դրանց առաքման ժամկետները, ոչ այն երկրները, որոնք դրանք կտրամադրեն։ 

Պենտագոնից հայտնել են, որ Օսթինը մայիսի 25-ին նախատեսված Ուկրաինայի պաշտպանության կոնտակտային խմբի վիրտուալ հանդիպման նախօրեին հեռախոսազրույց է ունեցել Ուկրաինայի պաշտպանության նախարարության ղեկավար Ալեքսեյ Ռեզնիկովի հետ։ 

Հանդիպմանը «հիմնական ուշադրությունը հատկացվելու է ուկրաինական զրահատեխնիկայի մանևրելու կարողության պահպանմանը և Ուկրաինայի հակաօդային պաշտպանության ամրապնդմանը»,- ասվում է հաղորդագրության մեջ։