ՏԵՍԱՆՅՈՒԹ․ Ի՞նչ է ասել Աշոտ Փաշինյանը վարչապետին իր առևանգման մասին
ՀՀ վարչապետ Նիկոլ Փաշինյանը չի հորդորել իր որդուն հետ վերցնել Գայանե Հակոբյանի դեմ ներկայացված բողոքը։ Նա այդ մասին հայտարարեց այսօր հրավիրված ասուլիսի ժամանակ։ Նիկոլ Փաշինյանը խոսել է որդու` Աշոտ Փաշինյանի առևանգման փորձի մասին։
«Երբ առաջին խոսակցությունը տեղի է ունեցել, իմ որդին զրկել է ինձ իրեն նման խնդրանքով կամ կոչով դիմելու համար»,– նշեց Փաշինյանը։
Նրա խոսքով` երբ իրավական ընթացք է տրվել հարցին, ինքը երկրում չի եղել։ Երբ զրուցել է որդու հետ, նա իր ներկայացրած բողոքը հիմնավորել է այն հանգամանքով, որ իրենց պայքարի ամբողջ նպատակը հենց այն է եղել, որ ՀՀ–ում հարցերն իրավական ձևերով լուծվեն։
«Նա ասաց` հիմա ես ո՞նց արձագանքեմ այդ փաստին։ Ասենք` ես էլ իմ ընկերներին կամ իմ ջոկատի անդամներին վերցնեմ, ինչ–որ պատասխան գործողություն անեմ կամ անհարգալից վերաբերմունքին անհարգալից վերաբերմունքով պատասխանեմ, կամ սպառնալիքին սպառնալիքով, կամ առևանգմանն առևանգմամբ պատասխանեմ։ Նա ինձ ասաց` բնականաբար, դա անընդունելի է, և ՀՀ–ում բոլոր մարդիկ պետք է արձանագրեն, որ հարցերը պետք է իրավական ճանապարհով լուծվեն»,– իր և որդու զրույցը լրագրողներին պատմեց Փաշինյանը։
Հիշեցնենք` մայիսի 17-ին տեղեկություն էր տարածվել, թե փորձել են առևանգել վարչապետի որդուն՝ Աշոտ Փաշինյանին։
