Իրանը և Ռուսաստանը ներդրումներ կանեն Սիրիայի հանքարդյունաբերության ոլորտում
Իրանն ու Ռուսաստանը ներդրումներ կկատարեն Սիրիայի հանքարդյունաբերության ոլորտում։ Այս մասին Սպուտնիկին ասել է երկրի նավթի և հանքային ռեսուրսների նախարար Ֆիրաս Քադուրը, գրել է Mehr-ը։
Ըստ Սիրիացի նախարարի՝ 9 ներդրումային հնարավորություն է առաջարկվել Սիրիայի ներդրումային գործակալության կողմից։
«Մենք ընդլայնում ենք նոր նախագծեր և արդյունաբերություններ։ Եվ ջանքեր են գործադրվում հեշտացնելու ներդրումները ստորգետնյա պաշարներում, հատկապես հանքային պաշարներում, որոնց մեծ մասը տեղակայված է հեռավոր վայրերում»,- ասել է նա։
Ըստ նախարարի՝ չնայած ամերիկյան պատժամիջոցներին, շփումներ են իրականացվել արաբական երկրների ու բարեկամ երկրների հետ, և որ այս ոլորտում նախագծերն ու ներդրումներն իրականացվում, վերանայվում են։
Սաուդյան Արաբիայի Ջիդդա քաղաքում վերջերս կայացած Արաբական լիգայի գագաթնաժողովում Սիրիայի էկոնոմիկայի և արտաքին առևտրի նախարարը կոչ էր արել արաբական երկրներին ներդրումներ կատարել երկրում՝ հաշվի առնելով ներդրումներ ներգրավելու խոստումնալից հնարավորությունների և նոր օրենքների առկայությունը։
