Facebook-ին տուգանել են 1.2 միլիարդ եվրոյով
Facebook սոցիալական ցանցի սեփականատեր Meta ընկերությունը տուգանվել է 1.2 միլիարդ եվրոյով՝ օգտատերերի տվյալների հետ սխալ վարվելու համար, երբ այդ տվյալները փոխանցվել են Եվրոպայի և Միացյալ Նահանգների միջև: Տեղեկությունը հայտնում է BBC-ն:
Իռլանդիայի Տվյալների պաշտպանության հանձնաժողովի կողմից սահմանված այս տուգանքն ամենամեծ տուգանքն է, որ սահմանվել է ԵՄ տվյալների պաշտպանության ընդհանուր կանոնակարգի գաղտնիության մասին օրենքով: Meta-ն հայտարարել է, որ կբողոքարկի այս «չհիմնավորված և ոչ անհրաժեշտ» որոշումը:
Իրավական պայմանագրերը, որոնք պատրաստվել են Եվրոպական հանձնաժողովի կողմից, պարունակում են երաշխիքներ՝ ապահովելու համար, որ անձնական տվյալները կշարունակեն պաշտպանվել Եվրոպայից դուրս փոխանցվելիս:
Բայց կան մտավախություններ, որ տվյալների այս հոսքերը դեռևս չեն պաշտպանում եվրոպացիներին, քանի որ ԱՄՆ-ում գաղտնիության մասին օրենքներն ավելի թույլ են, և այդ տվյալները կարող են հասանելի դառնալ ԱՄՆ-ի հետախուզության համար:
Հաղորդվում է, որ այս որոշումը չի ազդում Facebook-ի վրա Մեծ Բրիտանիայում: