Ճապոնական կողմը Ուկրաինային կտրամադրի 100 ռազմական բեռնատար և այլ մեքենաներ, ինչպես նաև մոտ 30 հազար լրակազմ բանակային չափաբաժիններ, որոնք օգտագործվում են Ճապոնիայի ինքնապաշտպանության ուժերի զինծառայողների կողմից։  Այս մասին ասվում է Ճապոնիայի արտգործնախարարության` երկուշաբթի տարածած հաղորդագրության մեջ։

Նշվում է, որ Ճապոնիայի վարչապետ Ֆումիո Կիսիդան համապատասխան խոստում է տվել Ուկրաինայի նախագահ Վլադիմիր Զելենսկիին՝ կիրակի Հիրոսիմայում կայացած բանակցությունների ժամանակ։

Կառավարության ղեկավարը նաև ասել է, որ Ճապոնիան կսկսի ընդունել ուկրաինացի վիրավոր զինվորներին բուժման համար, նշում է ԱԳՆ-ն։

 Վարչապետը նաև խոստացել է շարունակել համապարփակ աջակցությունն Ուկրաինային, այդ թվում՝ երկրի ենթակառուցվածքների վերականգնմանն ուղղված։

Մայիսի 19-ից 21-ը Ճապոնիան հյուրընկալել է Յոթնյակի խմբի (G7) գագաթնաժողովը Հիրոսիմայում։  Ի սկզբանե ենթադրվում էր, որ Զելենսկին դրան կմասնակցի տեսահոլովակի միջոցով։  Սակայն հետագայում նա ցանկություն է հայտնել անձամբ մասնակցել հանդիպմանը։

Նախագահը շաբաթ օրը ժամանել է Հիրոսիմայի օդանավակայան՝ ֆրանսիական կառավարական ինքնաթիռով։