Բրիտանացի պետնախարարը հայտարարել է, որ Բաքվում բարձրացրել է Լաչինի ապաշրջափակման հարցը

Միացյալ Թագավորությունը համընդհանուր խաղաղություն է ցանկանում Հարավային Կովկասում և որքան հնարավոր է շուտ։ Մամուլի ասուլիսի ժամանակ այս մասին հայտարարել է Միացյալ Թագավորության Եվրոպայի հարցերով պետնախարար Լեո Դոքերթին։

«Միացյալ Թագավորության դիրքորոշումը Լեռնային Ղարաբաղի հակամարտության հետ կապված չի փոխվել։ Մեկ անգամ ևս ամրապնդում ենք ԵՄ-ի և ԱՄՆ-ի դիրքորոշումն այդ ուղղությամբ։ Փորձում ենք համագործակցություն ամրացնել Հայաստանի և Միացյալ Թագավորության միջև և ուրախ եմ հայտարարելու, որ մեկնարկել է ռազմավարական երկխոսությունը, որը, հուսանք, տեղի կունենա այս տարվա երկրորդ կեսին։ Այն կընդլայնի մեր համագործակցության եզրը, հուսանք, որ դրական ընկալում կունենա», - ընդգծել է Լեո Դոքերթին։

Հարցին, թե արդյոք Բաքու կատարած այցի ժամանակ նա Ադրբեջանի իշխանությունների մոտ բարձրացրել է Լաչինի միջանցքի արգելափակման հարցը, Դոքերթին պատասխանեց, որ այո, այդ հարցը բարձրացրել է Բաքվում։