Արդյո՞ք աղբավայրի այրումից առաջացած օդը վտանգավոր է. մասնագետը պատասխանում է
Հայտնել էինք, որ Auroranews-ը շարունակում է ահազանգեր ստանալ, որ Երևանում տարօրինակ հոտ է տարածվել, քաղաքի վրա ծխի ամպ կա։ Ենթադրելով, որ խնդիրը Նուբարաշենի աղբավայրի տարածքում երեկ բռնկված հրդեհն է, կապ հաստատեցինք Երևանի քաղաքապետարանի աշխատակիցների հետ։
Auroranews-ը այս ընթացքում օդի աղտոտվածության մոնիտորինգի, փոփոխությունների և օդում գտնվող աղտոտիչների վտնագավոր լինելու մասին խոսել է Հիդրոօթերևութաբանության կենտրոն ՊՕԱԿ-ի տնօրենի տեղակալ Գայանե Շահնազարյանի հետ:
«Օդի աղտոտվածության մոնիտորինգը միշտ է արվում, անկախ նրանից հրդեհ կա թե ոչ: Հրդեհի հետևանքով մթնոլորտ արտանետված բոլոր աղտոտիչների մասով հնարավոր չէ իրականացնել մոնիտորինգ, որովհետև աղբավայրերի այրումից առաջացած աղտոտիչների քանակը շատ մեծ է` սկսած ծանր մետաղներից և այլն: Մեկ օրվա արդյունքներով օդի աղտոտվածությունը մեր դիտակայններում ազոտի երկօքսիդի, ծծմբի երկօքսիդի փոշու մասով չի ավելացել: Սակայն, բնականաբար, նշված պարամետրերը մթնոլորտային օդում կլինեն` չեմ կարող ասել` ինչ չափի է աղտոտվածությունը»,- նշել է Շահնազարյանը:
Auroranews-ի այն հարցին, արդյո՞ք այդ աղբավայրի այրումից առաջացած օդը վտանգավոր է մոտակա տարածքում ապրող մարդկանց համար, նա նշել է.
«Աղբավայրի այրումը վտանգավոր է, այդ պատճառով աշխատանքներ են տարվում, ամեն ինչ անում են, որպեսզի այրումը կարողանան մարել»,-ասել նա` հավելելով, որ աղբավայրը չպետք է այրվի:
«Պատուհանները անվերջ փակ պահել չեք կարող, քանի որ քամու միջոցով անընդհատ տարածվելու է ծուխը: Մթնոլորտային օդում ծանր մասնիկները մոտիկ տարածություն են տեղափոխվելու, իսկ թեթևները` ավելի հեռու: Ավելի խոցելի են դառնում մոտիկ ապրող բնակիչները, քանի որ նրանք կրելու են այդ աղտոտվածությունը բոլոր աղտոտիչների մասով, բայց միևնույն է օդում աղտոտվածությունը կա»,- ընդգծել է Շահնազարյանը:
