Շտապօգնության մեքենան եղել է համապատասխան տարբերանշանով և կահավորմամբ․ ՄԻՊ–ը` Սոթքի դեպքի մասին
Շտապօգնության մեքենայի և բուժանձնակազմի թիրախավորումը միջազգային մարդասիրական իրավունքի նորմերի խախտում է։
ՀՀ Մարդու իրավունքների պաշտպանի գրասենյակը հայտարարություն է տարածել` անդրադառնալով Սոթքում այսօր ադրբեջանական հերթական սադրանքին, որի հետևանքով 20-ամյա զինծառայողը զոհվել է, բուժակը` վիրավորվել։
Պաշտպանի հայտարարության մեջ ընդգծվում է, որ փաստերի ուսումնասիրությունը հիմք է տալիս եզրակացնելու, որ առկա է եղել դիտավորություն՝ վնասելու ինչպես շտապօգնության մեքենան, այնպես էլ զինծառայողին ու բուժանձնակազմին:
«Վիրավոր զինծառայողին տեղափոխող շտապօգնության մեքենան եղել է համապատասխան տարբերանշանով և կահավորմամբ»,– շեշտում է պաշտպանը։
Հիշեցնենք` մայիսի 17-ին` ժամը 16:15-ի սահմաններում, Ադրբեջանի ԶՈւ ստորաբաժանումները կրակ էին բացել Սոթքի հատվածում տեղակայված հայկական դիրքի ուղղությամբ, ինչի հետևանքով վիրավորում էր ստացել ՀՀ ՊՆ զինծառայող։
Այնուհետև Ադրբեջանի ԶՈւ ստորաբաժանումները կրակ էին բացել վիրավոր զինծառայողին տեղափոխող շտապօգնության մեքենայի ուղղությամբ: Շտապօգնության մեքենայի ուղղությամբ հակառակորդի բացած կրակից վիրավորում էր ստացել նաև բուժակը:
Ավելի ուշ ՊՆ-ն հայտնեց, որ Ադրբեջանի ԶՈւ բացած կրակի հետևանքով կյանքի հետ անհամատեղելի հրազենային վնասվածքներ ստացած զինծառայողը, մինչև հոսպիտալ տեղափոխվելը, զոհվել է:
