Իսպանիայի ԱԳՆ-ն բողոքի նոտա է հղել Թուրքիային
Իսպանիայի արտաքին գործերի նախարարությունը Անկարային բողոքի նոտա է հղել նախագահական ընտրություններին հետևելու նպատակով Թուրքիա մեկնած 10 իսպանացիներին բերման ենթարկելու և արտաքսելու համար: Տեղեկությունը հայտնում է РИА Новости-ն:
Իսպանիայի կառավարությունը դժգոհություն է հայտնել թուրքական իշխանությանը առ այն, որ դիտորդները բերման են ենթարկվել «առանց հիմնավորման և բացատրության»։
Գործակալության տվյալներով՝ ձերբակալվածների և արտաքսված իսպանացիների թվում եղել են նաև 3 խորհրդարանականներ։
Նշվում է նաև, որ ձերբակալման մասին հայտարարությունից սկսած Թուրքիայում Իսպանիայի դեսպանատունը մշտական կապի մեջ է եղել տուժածների և թուրքական իշխանությունների հետ։
Հիշեցնենք` մայիսի 14-ին Թուրքիայում կայացել են համընդհանուր` նախագահական և խորհրդարանական ընտրություններ։ Առաջին փուլից հետո Թուրքիայի գործող նախագահ Ռեջեփ Թայիփ Էրդողանը հավաքել է քվեների 49.51%-ը, ընդդիմադիր «Ժողովրդական դաշինքի» թեկնածու Քեմալ Քըլըչդարօղլուն՝ 44.88%-ը, Սինան Օհանը՝ 5.17%-ը:
