Անհայտ անձը ներխուժել է Սալիվանի տուն. The Washington Post

Կեսգիշերին կողմնակի անձը ներխուժել է ԱՄՆ նախագահ Ջո Բայդենի՝ ազգային անվտանգության հարցերով խորհրդական Ջեյք Սալիվանի տուն՝ չնկատված մնալով անվտանգության աշխատակիցների կողմից։

The Washington Post-ը հայտնել է, որ միջադեպը, որը տեղի է ունեցել մոտ երկու շաբաթ առաջ, հետաքննում է ԱՄՆ Գաղտնի ծառայությունը։ Վկայակոչելով երեք անանուն պետական պաշտոնյաների՝ թերթը նշում է, որ անհայտ տղամարդը ներխուժել է Սալիվանի տուն ապրիլի վերջին՝ առավոտյան ժամը 3-ի սահմանում: Հանդիպելով անծանոթին՝ Սալիվանը նրանից պահանջել է հեռանալ։

Սալիվանը շուրջօրյա հսկվում է Գաղտնի ծառայության կողմից: Այնուամենայնիվ, դրսում գտնվող գործակալները տեղյակ չեն եղել Վաշինգտոնի Վեսթ Էնդում գտնվող տուն ներխուժման մասին, մինչև որ տղամարդը հեռացել է, իսկ Սալիվանը դուրս է եկել և զգուշացրել նրանց, հաղորդում է Washington Post-ը:

Նշվում է, որ ներխուժածը կարծես հարբած է եղել և չի իմացել, թե որտեղ է գտնվում: Ոչ մի ապացույց չկա, որ նա ճանաչում է Սալիվանին կամ ցանկացել է վնասել նրան։