ԱՄՆ-ն շուտով զգալի ռազմական օգնություն կտրամադրի Թայվանին
Միացյալ Նահանգները շուտով զգալի լրացուցիչ ռազմական օգնություն կտրամադրի Թայվանին, հայտարարել է Պենտագոնի ղեկավար Լլոյդ Օսթինը։
Նման հայտարարություն նա արել է ԱՄՆ Սենատի հատկացումների հանձնաժողովում կայացած լսումների ժամանակ։
«Ես ուրախ եմ, որ Միացյալ Նահանգները շուտով զգալի լրացուցիչ ռազմական օգնություն կտրամադրի Թայվանին` շնորհիվ հատկացման իրավասության (պաշտպանության հաստատված ծախսերի միջոցով), որը ԱՄՆ նախագահ Ջո Բայդենին տրվեց ԱՄՆ Կոնգրեսի կողմից անցյալ տարի», - ասել է նա:
Օսթինը չի հստակեցրել, թե որ զինատեսակներն են ներառվելու ռազմական օգնության փաթեթում։
Ավելի վաղ Չինաստանի պաշտպանության նախարարության խոսնակ Թան Քեֆեյը հայտարարել էր, որ Չինաստանի Ժողովրդա-ազատագրական բանակը ուժեղացնում է պատերազմին պատրաստվելու ջանքերը՝ ԱՄՆ-ի կողմից Թայվանում անջատողականներին զենք մատակարարելու պատճառով։
Bloomberg-ն ավելի վաղ հայտնել էր, որ ԱՄՆ-ն պատրաստվում է 500 միլիոն դոլարի զենք փոխանցել Թայվանին՝ արագացված ընթացակարգով, որն օգտագործվում է Ուկրաինային ռազմական օգնություն տրամադրելու համար։
