ԱՄՆ պաշտպանության նախարարը հայտնել է, թե երբ Ուկրաինան կստանա Abrams տանկերը
ԱՄՆ պաշտպանության նախարար Լլոյդ Օսթինը հայտարարել է, որ մինչև աշնան սկիզբ Ուկրաինան անպայման կստանա Abrams տանկեր, այնուհետև պետք է ավարտվեն ուկրաինացի զինվորականների պատրաստման ծրագրերը։ Այս մասին հայտնում է Ամերիկայի ձայնը։
«Մենք անում ենք հնարավոր ամեն ինչ, որպեսզի արագացնենք այդ տանկերի մատակարարումը։ Մեր կանխատեսումներով դա տեղի կունենա վաղ աշնանը։ Այդ ընթացքում մենք մի քանի տանկ ենք տեղափոխել ուսումնամարզական հավաք, որպեսզի ուկրաինացիները սկսեն մարզվել։ Մինչ զորավարժությունները կավարտվեն, տանկերը հասանելի կլինեն օգտագործման համար»,- ասել է դեպարտամենտի ղեկավարը Սենատի լսումների ժամանակ:
Նրա խոսքով՝ նման ժամկետները բացատրվում են նրանով, որ ԱՄՆ զինվորականները ոչ միայն այդ տանկերն են ուղարկում Կիև և պատրաստում ուկրաինացի զինվորականներին՝ աշխատելու դրանց վրա, այլ նաև ստեղծում են ենթակառուցվածք, որը կաջակցի մարտական մեքենաների շահագործմանը։
«Ինչպես գիտեք, այս տեխնիկան էապես տարբերվում է, մասնավորապես, տուրբինային շարժիչի և այլ բավականին բարդ համակարգերի շնորհիվ։ Բայց մենք փորձում ենք որքան հնարավոր է շուտ այդ տեխնիկան փոխանցել ուկրաինացիներին։»,- ավելացրել է Օսթինը:
