Ադրբեջանցիների նպատակը Սոթքի հանքն է․ ռազմական փորձագետ

Սոթքի վրա հարձակվելով՝ ադրբեջանցիները հանքավայրն ամբողջությամբ վերցնելու նպատակ են հետապնդել։ Այս մասին NEWS.am-ի հետ զրույցում նշեց ռազմական փորձագետ Հայկ Նահապետյանը։
 

«Եթե մինչև սա խոչընդոտում էին աշխատողներին իրենց աշխատավայր գնալ՝ հրազեն օգտագործելով, հիմա օգտագործում են ականանետ։ Ենթադրում եմ՝ հակառակորդը բավականին ուժեր է կենտրոնացրել, որ մեր առաջնագիծը եւ Սոթքի հանքավայրն ամբողջությամբ վերցնի, որովհետեւ հանքավայրը վաճառված է մեծբրիտանական ընկերության։ Այդ մեծ կուտակումները, այնուամենայնիվ, գործողության մեջ չեն մտել, որովհետեւ հայկական կողմը նախօրոք իմացել է հակառակորդի ծրագրերի մասին, եւ ադրբեջանցիներին մնացել է ականետերով խուճապ տարածելը։ Կարծում եմ՝ առաջիկայում կրկին կլինեն հարձակումներ հանքի ուղղությամբ, այլ ուղղությամբ եւս չի բացառվում»,- ասել է Նահապետյանը։
 

Նահապետյանի համար հարց է, թե լարված իրադրության ժամանակ որտեղ են լինում Եվրոպական միության դիտորդները և ինչ են անում։
 

«Ես կարծում եմ՝ իրենք այդ դիրքերում մեկ-երկու օր առաջ են եղել, ինչպես Տեղի դեպքում էր։ Առավել եւս որ իրենք առաջնահերթ Ադրբեջան եւ Բրյուսել են ուղարկում իրենց զեկույցները, ոչ թե մեր արտգործնախարարություն»,- նշել է Նահապետյանը։