Մեծ Բրիտանիան պատրաստվում է Ուկրաինային հեռահար հրթիռներ մատակարարել

Մեծ Բրիտանիայի իշխանությունները պատրաստվում են հեռահար հրթիռներ տեղափոխել Կիև, գրում է ամերիկյան The Washington Post թերթը՝ հղում անելով Ուկրաինայի միջազգային հիմնադրամի (IFU) հրապարակած փաստաթղթին։  Նշվում է, որ IFU-ն ղեկավարում է Մեծ Բրիտանիայի պաշտպանության նախարարությունը, իսկ հիմնադրամին մասնակցում են Հյուսիսային Եվրոպայի երկրները։

Գործակալության տվյալներով՝ այս հարցի վերաբերյալ վերջնական որոշում դեռ չի կայացվել։

Մայիսի 2-ին Ուկրաինայի միջազգային հիմնադրամի կողմից հրապարակված գնումների ծանուցման մեջ Միացյալ Թագավորության ՊՆ-ն խնդրել է «հետաքրքրություն արտահայտել» մինչև 300 կիլոմետր կամ մոտ 200 մղոն հարվածային հնարավորություններ տրամադրելու հարցում:

Ծանուցումը պահանջում էր պատասխան եռօրյա ժամկետում, նշվում է հրապարակման մեջ։

Գործակալության զրուցակիցը պարզաբանել է, որ, ելնելով պահանջվող բնութագրերից, պարզ է դառնում, որ դրանք կարող են լինել բրիտանական Storm Shadow օդային թեւավոր հրթիռներ։

Լրագրողները նաև մեջբերել են Պենտագոնի գաղտնի փաստաթղթերը, որոնք վկայում են այն մասին, որ ԱՄՆ հետախուզությունը հաստատել է  Ուկրաինային անորոշ քանակությամբ նմանատիպ հրթիռներ ուղարկելու բրիտանական պլանները: