ԱՄՆ-ն Ուկրաինային 1,2 միլիարդ դոլարի ռազմական օգնության նոր փաթեթ է հատկացրել

ԱՄՆ-ը 1,2 միլիարդ դոլարի ռազմական օգնության նոր փաթեթ է հատկացրել Ուկրաինային, նշվում է ԱՄՆ պաշտպանության նախարարության կայքում։ 

Հաղորդվում է, որ օգնությունը կուղարկվի Ուկրաինայի հակաօդային պաշտպանությունն ուժեղացնելու և հրետանային զինամթերքի կարիքները բավարարելու համար։

Նոր փաթեթը ներառում է լրացուցիչ հակաօդային պաշտպանության համակարգեր և զինամթերք, սարքավորումներ՝ ուկրաինական համակարգերի հետ արևմտյան հակաօդային պաշտպանության կայանների և հրթիռների ինտեգրման համար, զինամթերք՝ հակադրոնային համակարգերի համար, 155 մմ հրետանային արկեր, արբանյակային պատկերների ծառայություններ, աջակցություն ռազմական պատրաստությանը։

Ապրիլի վերջին ՆԱՏՕ-ի գլխավոր քարտուղար Յենս Ստոլտենբերգը Կիև կատարած այցի ժամանակ ասաց, որ 2022 թվականի փետրվարից ՆԱՏՕ-ի դաշնակիցները ավելի քան 150 միլիարդ եվրո են տրամադրել Ուկրաինային, այդ թվում՝ 65 միլիարդ եվրո՝ ռազմական օգնության տեսքով:

Ստոլտենբերգի խոսքով՝ դա ուկրաինական բանակին թույլ է տվել վերականգնել վերահսկողությունը Կիևի, Խարկովի և Խերսոնի շրջանների տարածքների նկատմամբ։ ՆԱՏՕ-ն նաև մարզել է տասնյակ հազարավոր ուկրաինացի զինվորների, ասել է դաշինքի գլխավոր քարտուղարը։