Թուրքիայի ԱԳՆ-ն անդրադարձել է ՀՀ-ում «Նեմեսիս» գործողությանը նվիրված արձանի տեղադրմանը

Թուրքիան արձագանքել է Երևանում Նեմեսիս գործողության մասնակիցների արձանի տեղադրմանը, խստորեն դատապարտելով այն։

Թուրքիայի ԱԳՆ–ն նշել է, թե «հուշարձանի բացումը փառաբանում է արյունալի գործողությունը, որը ճանապարհ է բացել դեպի հրեշավոր ահաբեկչություններ»։ 

«Նման սադրիչ քայլերը, որոնք անհամատեղելի են Թուրքիայի և Հայաստանի միջեւ հարաբերությունների կարգավորման գործընթացի ոգու հետ, որեւէ կերպ չեն նպաստի տարածաշրջանում կայուն խաղաղության և կայունության հաստատմանն ուղղված ջանքերին։ Ընդհակառակը, դրանք բացասաբար կանդրադառնան կարգավորման գործընթացի վրա»,– ասված է Թուրքիայի ԱԳՆ հայտարարության մեջ։

Ավելի վաղ էլ հայտնել էինք, որ Ադրբեջանի ԱԳ նախարարությունը անդրադարձել է Երևանում բացված «Նեմեսիս» գործողությանը նվիրված արձանի բացման արարողությանը և մեղադրանքներ հնչեցրել Հայաստանի հասցեին։ 

Հիշեցնենք, որ Հայոց ցեղասպանությունից շուրջ մեկ դար անց Երևանի սրտում՝ Օղակաձև զբոսայգու չորրորդ հատվածում, հանդիսավորությամբ բացվել է «Նեմեսիս» գործողության հերոսների հիշատակը հավերժացնող աղբյուր-հուշակոթող: