«Վագներ» մասնավոր խմբավորումը փորձել է զենք գնել Թուրքիայից. The Washington Post

«Վագներ» մասնավոր խմբավորումը փետրվարին փորձել է զենք գնել Թուրքիայից: Այս մասին գրում է The Washington Post-ը: Պարբերականը հղում է անում համացանցում հայտնված ամերիկյան գաղտնի փաստաթղթերին։

Նշվում է, որ փետրվարի սկզբին «Վագներ»-ի ներկայացուցիչները հանդիպել էին թուրքական կողմի հետ՝ զենք և սարքավորումներ ձեռք բերելու համար: Հրապարակված նյութերից պարզ չէ, թե արդյոք թուրքական կառավարությունը տեղյակ է եղել «Վագներ»-ի՝ զենք ձեռք բերելու ջանքերի մասին, և արդյոք ռազմական ընկերությունը կարողացել է համաձայնության գալ գնման շուրջ:

Թուրքիայի կառավարության ներկայացուցիչները դա չեն մեկնաբանել։

Հիշեցնենք՝ The New York Times-ը հայտնել էր, որ Պենտագոնը հետաքննում է սոցցանցում գաղտնի նյութերի արտահոսքը՝ կապված ուկրաինական բանակը հակահարձակման նախապատրաստելու ԱՄՆ-ի և ՆԱՏՕ-ի ծրագրերի հետ: Միևնույն ժամանակ, փորձագետները չեն բացառում, որ փաստաթղթերը կարող են լինել օտարերկրյա հետախուզական ծառայությունների ապատեղեկատվություն։