ԱՄՆ-ն պատժամիջոցներ է սահմանել վրացի բարձրաստիճան դատավորների նկատմամբ
ԱՄՆ-ն վիզային պատժամիջոցներ է սահմանել վրացի բարձրաստիճան դատավորների, Վրաստանի արդարադատության բարձրագույն խորհրդի չորս անդամների նկատմամբ։ ԱՄՆ պետքարտուղար Էնթոնի Բլինկենը նրանց մեղադրել է «զգալի կոռուպցիայի» մեջ։
«Այդ անձինք չարաշահել են Վրաստանի դատարանների նախագահների և արդարադատության բարձրագույն խորհրդի անդամների իրենց պաշտոնը՝ խարխլելով օրենքի գերակայությունը և հանրային վստահությունը Վրաստանի իրավական համակարգի նկատմամբ։ Ամերիկայի Միացյալ Նահանգները շարունակում է աջակցել Վրաստանի քաղաքացիներին ժողովրդավարության և օրենքի գերակայության ամրապնդման գործում և կշարունակի պատասխանատվության ենթարկել նրանց, ովքեր չարաշահում են պետական իշխանությունը անձնական շահի համար։ Մենք աջակցում ենք բոլոր դատավորներին, որոնք ունեն անաչառ և անկախ գործելու քաջություն և ազնվություն»,- ասված է Թբիլիսիում ԱՄՆ դեսպանատան կայքում տեղադրված հայտարարության մեջ։
