Ադրբեջանի հերթական հակահայկական ելույթը՝ ՄԱԿ-ի ամբիոնից

Լաչինի միջանցքի ապօրինի շրջափակումից շուրջ երեք ամիս անց, պաշտոնական Բաքուն շարունակում է ոչ միայն անտեսել ու հերքել միջազգային հանրության պահանջները, այլև առաջ քաշել բնապահպանական կեղծ թեզերը՝ մեղադրելով հայկական կողմին։

Նյու Յորք (ԱՄՆ) կատարած աշխատանքային այցի շրջանակներում Ադրբեջանի խորհրդարանի նախագահ Սահիբա Գաֆարովան մասնակցել է ՄԱԿ-ի բարձր մակարդակի հանդիպմանը։

Միջոցառումը նվիրված է եղել ՄԱԿ-ի Գլխավոր ասամբլեայի բանաձևին, որն ընդունվել է Թուրքիայի առաջին տիկին Էմինե Էրդողանի կողմից առաջ քաշված «զրոյական արտանետումների» նախաձեռնության հիման վրա։
 

Գաֆարովան իր ելույթում նշել է, որ բոլոր երկրները բարոյական և իրավական պարտավորություն ունեն պաշտպանել շրջակա միջավայրը՝ հանուն ներկա և ապագա սերունդների։ 

Նա հնչեցրել է ադրբեջանական քարոզչամեքենայի չարչրկված թեզը, թե Հայաստանն, իբր, «օկուպացիայի» 30 տարիների ընթացքում Ադրբեջանի միջազգայնորեն ճանաչված տարածքների 20 տոկոսը ենթարկել է բնապահպանական «ահաբեկչության»։ 

Ադրբեջանի խորհրդարանի խոսնակն ինքնամոռաց մեղադրանքներ է հնչեցրել և ասել, թե հայերը «ոչնչացրել են անտառներն ու արգելոցները, անօրինական կերպով շահագործել Ադրբեջանի բնական պաշարները, աղտոտել հողերն ու գետերը, այդ թվում՝ Ադրբեջանի տարածքում հոսող անդրսահմանային գետերը»։