Ալեքսեյ Մոսկալևը՝ աշակերտուհի Մաշա Մոսկալյովայի հայրը, ով հակապատերազմական նկար է նկարել, դատապարտվել է երկու տարվա ազատազրկման քրեակատարողական գաղութում։ Mediazona-ի փոխանցմամբ՝ նման որոշում է կայացրել Տուլայի մարզի Եֆրեմովյան միջշրջանային դատարանը։ Նա դատվել է ռուսական բանակի կրկնակի «վարկաբեկման» հոդվածով (ՌԴ Քրեական օրենսգրքի 280.3-րդ հոդվածի 1-ին մաս): 

Դատավորը հայտարարեց նաև, որ Մոսկալևի դստերը տեղափոխում են սոցիալական ծառայությունների խնամքի։ Դատախազությունը Մոսկալեւի համար երկու տարվա ազատազրկում է պահանջել։ Ինքը՝ Մոսկալևը, ներկա չի եղել դատավճռի հրապարակմանը, քանի որ փախել է տնային կալանքից։ 

Դատարանի խոսնակ Օլգա Դյաչուկը հայտնել է, որ նա փախել է տնային կալանքից դատավճռի նախօրեին գիշերը։ Մաշա Մոսկալեւան արվեստի դասին հակապատերազմական նկար է նկարել՝ «Ոչ պատերազմին» և «Փառք Ուկրաինային» մակագրություններով։ Սա 2022 թվականի ապրիլին էր։ Նկարում պատկերված էր Ուկրաինայի դրոշով մի կին, որը երեխային պաշտպանում էր հրթիռներից։ Դասի հաջորդ օրը ոստիկանները դպրոցից տարել են Մոսկալևին և նրա դստերը։ Գերատեսչությունում նա իմացել է, որ իր դեմ արձանագրություն է կազմվել «Օդնոկլասնիկիում» մեկնաբանության պատճառով բանակը «վարկաբեկելու» մասին։ Մեկնաբանության տեքստն է՝ «Ռուսական բանակ. Հանցագործները մեզ հետ են»: 

Այս արձանագրության համաձայն՝ դատարանը Մոսկալյովին տուգանել է 32000 ռուբլով։ Փաստաբան Դմիտրի Զախվատովը պատմել է, որ Ալեքսեյ Մոսկալևը կապ է հաստատել իր հետ ռուսական բանակը «վարկաբեկելու» գործով երկու տարվա ազատազրկման նախօրեին, սակայն փախել է տնային կալանքից։ Նա խնդրել է պաշտպանին հրապարակել մի նամակ, որն իրեն գրել է իր դուստրը՝ Մաշան։ «Հայրիկ, բարև, ես խնդրում եմ, որ չհիվանդանաս և չանհանգստանաս: Ինձ մոտ ամեն ինչ լավ է, ես քեզ շատ եմ սիրում և գիտեմ, որ դու ոչ մի բանում մեղավոր չես, ես միշտ քո կողքին եմ և այն ամենը, ինչ անում ես, ճիշտ է։ Իմացիր, որ մենք հաղթելու ենք, այդ հաղթանակը մերն է լինելու, ինչ էլ որ լինի, մենք միասին ենք, թիմ ենք, դու լավագույնն ես։ 

Դու իմ հայրն ես, աշխարհի ամենախելացի, ամենագեղեցիկ, ամենալավ հայրիկը: Իմացիր, որ քեզնից լավը չկա։ Խնդրում եմ, պարզապես մի հանձնվիր: Հավատա, հուսա և սիրիր»,- ասվում է նամակում։ Հիշեցնենք՝ Տուլայի շրջանի 53-ամյա բնակիչ Ալեքսեյ Մոսկալևը փախել է տնային կալանքից՝ նախքան Ռուսաստանի Դաշնության զինված ուժերի վարկաբեկման գործով դատավճռի հրապարակումը, հայտնում է РИА Новости-ն՝ դատարանի մամուլի ծառայությանը հղումով։ Նախնական տվյալներով՝ տղամարդը կտրել էր էլեկտրոնային թեւնոցներն ու դիմել փախուստի։ Դատարանը Մոսկալևին դատապարտել էր երկու տարվա ազատազրկման՝ իր սոցիալական ցանցերում ՌԴ ԶՈւ-ն վարկաբեկող գրառումներ հրապարակելու համար։ 

Նշենք, որ տղամարդը միայնակ է մեծացնում երեխային։ Կալանավորումից հետո Մոսկալևի դստերը Տեղափոխել են սոցիալական վերականգնողական կենտրոն։