Իսրայելի դատական բարեփոխումները քննադատելուց հետո պաշտպանության նախարարը պաշտոնից հեռացվել է

Իսրայելի վարչապետ Բենիամին Նեթանյահուն պաշտոնից հեռացրել է երկրի պաշտպանության նախարար Յոավ Գալանտին: Սա այն բանից հետո, երբ Գալանտը հրապարակավ կոչ է արել կառավարությանը դադարեցնել արմատական դատական բարեփոխումների ընդունումը:

Իսրայելում արդեն երրորդ ամիս է, ինչ չեն հանդարտվում ժողովրդական բողոքները՝ կապված Գերագույն դատարանի լիազորությունները սահմանափակելու կառավարության ծրագրերի հետ: Այժմ նա հնարավորություն ունի արգելափակել խորհրդարանի որոշումները, եթե դրանք ոչ իրավաչափ համարի․ այս մասին տեղեկացնում է BBC-ն։

Շաբաթ օրը ելույթ ունենալով հեռուստատեսությամբ՝ Գալանտը նշել է, որ առաջարկվող դատական բարեփոխումը հսկայական պառակտում է առաջացրել հասարակության մեջ, ինչպես նաև զայրույթի, ցավի և հիասթափության աննախադեպ զգացողություն, որը տարածվել է նաև բանակի վրա:

«Սա ակնհայտ, անմիջական և շոշափելի սպառնալիք է պետության անվտանգության համար»,- հայտարարել է պաշտպանության այժմ արդեն նախկին նախարարը: Նա հավելել է, որ հրաժարվում է աջակցել նախաձեռնությանն իր ներկայիս տեսքով և կառուցողական երկխոսության կոչ է արել:

Այս հայտարարությունից հետո վարչապետն իր մոտ է կանչել նախարարին և հայտնել, որ կորցրել է նրա հանդեպ վստահությունը, և վերջինս այլևս չի կարող ղեկավարել պաշտպանական գերատեսչությունը: