Ադրբեջանը խախտում է 2020 թվականի եռակողմ հայտարարության դրույթները․ Միրզոյան

Մոսկվայում սկսվել է ՌԴ ԱԳ նախարար Սերգեյ Լավրովի և ՀՀ ԱԳ նախարար Արարատ Միրզոյանի՝ ընդլայնված կազմով հանդիպումը։

«Ցավոք սրտի, գործնականում նոյեմբերի 9-ի եռակողմ հայտարարության մեջ չկա մի կետ, որ Ադրբեջանը չխախտի»,- ասել է Միրզոյանը։

Նախարարը ընդգծել է, որ Բաքուն սիստեմատիկորեն խախտել է հրադադարը, օկուպացրել է Հայաստանի տարածքները, ապօրինի փակել Լաչինի միջանցքը, պահել հայ ռազմագերիներին։

Միրզոյանի խոսքով, Հայաստանը դաշնակիցներից ակնկալում է ակտիվ քայլեր ձեռնարկել Ադրբեջանի պարտավորությունների կատարման համար, ինչպես նաև դադարեցնել ուժի կիրառումը։

Ավելի վաղ Հայաստանի ԱԳՆ ղեկավարը Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Իմանգալի Թասմագամբետովի հետ հանդիպման ժամանակ հայտարարել էր Երեւանի դեմ Բաքվի «ռազմական ագրեսիային» արձագանքելու անհրաժեշտության մասին։

Մինչ այս ՀՀ վարչապետ Նիկոլ Փաշինյանը հայտարարել էր, որ ռուս խաղաղապահների շնորհիվ Լեռնային Ղարաբաղում հումանիտար ճգնաժամը աղետի չի վերածվել։ Նրա խոսքով, 2020 թվականին Ռուսաստանը ստանձնել է Լեռնային Ղարաբաղի բնակչության անվտանգության և քաղաքացիական ենթակառուցվածքների անվտանգության երաշխավորի դերը։