«Հայաստանը հետաքրքրված չէ խաղաղության համաձայնագրով». Ադրբեջանի ԱԳՆ
«Հայաստանը հետաքրքրված չէ խաղաղության համաձայնագրով, քանի որ դեմ է համաձայնագրի տեքստում Ադրբեջանի նկատմամբ տարածքային հավակնությունները բացառող կետերին»,- հայտարարել է Հաջիզադեն՝ Փաշինյանին մեղադրելով նաև անտարբերության մեջ։
Ադրբեջանի արտգործնախարարության խոսնակ Այխան Հաջիզադեն արձագանքել է Հայաստանի վարչապետ Նիկոլ Փաշինյանի երեկ հնչեցրած հայտարարություններին:
«Այն, որ Հայաստանի վարչապետն ասուլիսի ժամանակ հայտարարում է, թե պատրաստ է ստորագրել {խաղաղության պայմանագրի} նախագիծը, որում նշվում էին միայն Հայաստանի առաջարկները և հաշվի չէին առնվում Ադրբեջանի առաջարկները, խաղաղ գործընթացի նկատմամբ նրա անտարբերության ևս մեկ ապացույց է», - պնդել է Ադրբեջանի արտգործնախարարության խոսնակը:
Հաջիզադեն միջազգային հանրությանը կոչ է արել դատապարտել և կանխել «Հայաստանի այդ ապակառուցողական գործողությունները»։
