Այս օրենքը Մոսկվայի թելադրանքն է. Վրաստանի նախագահի ուղերձը

Վրաստանի նախագահը այս օրերին պաշտոնական այցով գտնվում է Նյու Յորքում, սակայն տեղեկանալով մայրաքաղաքում զանգվածային բողոքի ակցիաների մասին՝ նա հանդես է եկել ուղերձով՝ աջակցություն հայտնելով ընդդիմադիրներին, գրում է newsgeorgia.ge կայքը։

«Ես դիմում եմ նրանց, ովքեր այս գիշեր կանգնած են Ռուսթավելիի վրա, քանի որ նրանք բազմիցս են կանգնել։ Ես կանգնած եմ այստեղ՝ Նյու Յորքում, իմ հետևում Ազատության արձանն է: Ազատությունը խորհրդանիշ է, որի համար Վրաստանը միշտ պայքարել է… Ես ձեր կողքին եմ: Այսօր դուք ներկայացնում եք ազատ Վրաստանը։ Վրաստանը, որն իր ապագան տեսնում է Եվրոպայում, ոչ մեկին թույլ չի տա խլել այս ապագան։ Այս ապագան պատկանում է մեր հաջորդ սերնդին։ Սա այն ապագան է, որը պատրաստել էին նախորդ սերունդները, և մենք ենք պատրաստել։ Ոչ ոք իրավունք չունի քեզնից խլել քո ապագան։ Ոչ ոք իրավունք չունի թակարդներ լարել: Այս օրենքը ոչ մեկին պետք չէր, այն վերցված էր ոչ մի տեղից, բացի Մոսկվայի թելադրանքից։ Սա պետք է չեղարկվի: Ոչ մի ձևով այն չպետք է ուղարկվի Վենետիկի հանձնաժողով։ Նրանք շատ լավ գիտեն, թե ինչ օրենք է սա։ Առաջին օրվանից ասել եմ, որ վետո է լինելու։ Եվ վետո կլինի։

Ինձ չի հետաքրքրում հոդված առ հոդված քննարկումը, դրա նմանությունը հին ամերիկյան օրենքին, որը, ինչպես շատ լավ գիտենք, ծառայում է միանգամայն այլ նպատակի։ Ինձ հետաքրքրում է միայն Վրաստանի ապագան, միայն սահմանադրությունը, որի երաշխավորը ես եմ, և այս սահմանադրությունն ասում է, որ Վրաստանի բոլոր ինստիտուտները և առաջին հերթին ես, կառավարությունը, իշխանությունները պարտավոր ենք անել ամեն ինչ այս երկիրը տանելու Եվրամիություն, պաշտպանելու եվրաինտեգրման ճանապարհը։ Այսօր այս օրենքին սատարողները և այս օրենքին կողմ քվեարկողները խախտում են սահմանադրությունը։ Դուք մեզ բոլորիս հեռացնում եք Եվրոպայից», - ասել է նախագահը։

Հիշեցնենք, որ երեկ հատուկ ջոկատայինները ջրցան մեքենաներ են կիրառել Թբիլիսիում խորհրդարանի դիմաց ցույցը ցրելու համար: Հավաքվածները բողոքել են օտարերկրյա գործակալների մասին օրինագծի ընդունման դեմ։