ՏԵՍԱՆՅՈՒԹ․ Ես համարում եմ, որ ՌԴ-ն մեր լավագույն դաշնակիցն է․ ինչ են մեզ առաջարկում մյուսները․ Սերժ Սարգսյան

«Բանակցային առաջնագծում» գրքի շնորհանդեսից հետո լրագրողների հետ զրույցում ՀՀ երրորդ նախագահ Սերժ Սարգսյանը կարծիք է հայտնել, որ ՌԴ խաղաղապահներին ուղղված քննադատությունը ավել–պակաս խոսակցություն է։

Միևնույն ժամանակ, նա նշել է, որ նույնպես ոգևորված չէ ՌԴ որոշ պաշտոնյաների հայտարարություններից և անթույլատրելի է համարում նրանց կողմից ահաբեկչին և ահաբեկչի թիրախին նույն հարթության վրա դնելն ու երկուսին հանդարտության կոչ անելը։ 

Միևնույն ժամանակ Սարգսյանն ասել է, որ ԼՂ-ում ադրբեջանական վերջին ահաբեկչական գործողությունների ժամանակ հենց ՌԴ ՊՆ-ն հանդես եկավ հասցեական հայտարարությամբ, իսկ եվրոպական միության հատուկ ներկայացուցիչը այն ուղղակի անվանեց «արյունալի միջադեպ»։

«Ես երբեք ռուսամոլ չեմ եղել, չեմ էլ լինելու։ Ես համարում եմ, որ ՌԴ-ն մեր լավագույն դաշնակիցն է։ Նրանք, ովքեր ուզում են գալ այս տարածաշրջան, ի՞նչ են մեզ առաջարկում։ Իսկ ովքեր այդ գաղափարն առաջ են տանում այդպիսի պայմանավորվածություն ունե՞ն, ՆԱՏՕ-ն գալու է այստեղ, ռազմաբազա դնի, եվրոպական մի որևէ երկիր Ղարաբաղում կոնտիգե՞նտ է ունենալու»,-ասել է Սարգսյանը։

ՀՀ երրորդ նախագահը միաժամանակ շեշտել է, որ դաշնակցային հարաբերությունները միակողմանի օգնության համար չեն, և Հայաստանը չպետք է ձեռքերը ծալի և միայն օգնություն ակնկալի։

«Պետք է հասկանալ, որ միջազգային քաղաքականությունը շատ կոշտ, դաժան կողմեր ունի։ Երբ տեսնում են, որ մարդ այդտեղից բան չի հասկանում, անմիջապես կուլ են տալիս։ Այո՛, ՌԴ-ն եղել է և հիմա էլ մեր դաշնակիցն է, իսկ մեր կողմից տեսնո՞ւմ եք այդպիսի դաշնակցային հարաբերություններ»,- հարց է տվել Սարգսյանը։