Այս մահացու միջադեպն ընդգծում է կայունության հասնելու համար բանակցություններում առաջընթացի կարևորությունը․ Տոյվո Կլաար

Այսօրվա մահացու միջադեպը ընդգծում է կայունության և արդար խաղաղության հասնելու համար բանակցություններում առաջընթացի կարևորությունը՝ անդրադառնալով երեկ ադրբեջանցիների իրականացրած դիվերսիոն հարձակմանը, թվիթերյան իր էջում այս մասին գրել է Հարավային Կովկասում Եվրամիության հատուկ ներկայացուցիչ Տոյվո Կլաարը, որը նաև տեղեկացրել է, որ գտնվում է Բաքվում:

«Վերադարձ Բաքու. անհամբեր սպասում եմ Ադրբեջանի ղեկավարության հետ առարկայական բանակցություններին՝ Մյունխենի հանդիպումներից հետո խաղաղ գործընթացը զարգացնելու համար։ Այսօրվա մահացու միջադեպը ընդգծում է կայունության և արդար խաղաղության հասնելու համար բանակցություններում առաջընթացի կարևորությունը»,- գրել է Հարավային Կովկասում ԵՄ հատուկ ներկայացուցիչը։

Հիշեցնենք, որ երեկ առավոտյան՝ ժամը 10։00-ի սահմաններում, ադրբեջանական զինուժի դիվերսիոն խումբը թիրախավորել և կրակ է բացել ոստիկանության անձնագրային և վիզաների վարչության անձնակազմի հերթափոխի մեքենայի վրա, ինչի հետևանքով զոհվել է ոստիկանության 3 ծառայող՝ փոխգնդապետ Արմեն Մայորի Բաբայանը, մայոր Դավիթ Վալերիի Դանիելյանը, լեյտենանտ Արարատ Թելմանի Գասպարյանը: Եվս մեկ ծառայող՝ լեյտենանտ Դավիթ Աշոտի Հովսեփյանը, ստացել է հրազենային վիրավորում և գտնվում է հանրապետական բժշկական կենտրոնում՝ բժիշկների հսկողության տակ: