Թուրքական ընդդիմությունը չի կարողացել համաձայնության գալ նախագահի միասնական թեկնածուի շուրջ

Թուրքական ընդդիմադիր «Լավ կուսակցության» (IP) առաջնորդ Մերալ Աքշեները հայտարարել է, որ լքում է վեց կուսակցություններից բաղկացած ընդդիմադիր դաշինքը նախագահի թեկնածուի շուրջ տարաձայնությունների պատճառով, ուրբաթ հաղորդում է Daily Sabah-ը։
 

«Մենք անխոնջ աշխատել ենք ընդդիմության ձայնը լսելի դարձնելու, ժողովրդի ակնկալիքները ընդդիմությանը հասցնելու համար։ Երեկվա հանդիպմանը հինգ կուսակցություններ առաջադրեցին Քեմալ Քըլըչդարօղլուի թեկնածությունը, իսկ մենք՝ Մանսուր Յավասին և Էքրեմ Իմամօղլուին։ Ցավոք, մեր առաջարկը մերժվել է»,- ասել է Աքշեները։ Նրա խոսքով՝ դաշինքն այսկերպ ապացուցեց, որ «իր որոշումներում չի արտացոլում ժողովրդի կամքը», ուստի IP-ն հեռանում է դրանից։
 

Միաժամանակ Աքշեները նշել է, որ իր կուսակցությունը կշարունակի հակադրվել Թուրքիայի նախագահ Ռեջեփ Թայիփ Էրդողանի գլխավորած իշխող «Արդարություն և զարգացում» կուսակցությանը։
 

Նա նաև հորդորել է իր թեկնածուներին՝ Յավաշին և Իմամօղլուին, որոնք համապատասխանաբար Անկարայի և Ստամբուլի քաղաքապետեր են, «շարունակել կատարել իրենց առաջադրանքները» և փորձել հաղթել ընտրություններում։
 

Իր հերթին դաշինքի մեծամասնությամբ առաջադրված Ժողովրդահանրապետական ​​կուսակցության ղեկավար Քեմալ Քըլըչդարօղլուն հայտարարել է, որ անհանգստության պատճառ չկա։
 

«Մի անհանգստացեք, ամեն ինչ իր տեղը կընկնի»,- ասել է նա։
 

Հունվարին Թուրքիայի առաջնորդ Ռեջեփ Թայիփ Էրդողանը հայտարարեց, որ Թուրքիայում նախագահական և խորհրդարանական ընտրությունները տեղի կունենան մայիսի 14-ին։ Սկզբում ընտրությունները նշանակված էին հունիսի 18-ին, սակայն Էրդողանը բազմիցս հայտարարել է, որ քվեարկությունը կարող է տեղի ունենալ ավելի վաղ։ Նրա կուսակցությունից նշել են, որ հունիսին կայանալիք ընտրությունները կհամընկնեն բարձր տուրիստական ​​սեզոնի հետ, ուստի ավելի լավ է դրանք հետաձգել։
 

Նախընտրական հարցումները ցույց են տալիս, որ թե՛ նախագահական, թե՛ խորհրդարանական ընտրություններում պայքարը կոշտ է լինելու։

Արևմտյան ԶԼՄ-ները գալիք ընտրություններն անվանում են Էրդողանի համար «ամենամեծ փորձությունը» վերջին 20 տարում։ Միևնույն ժամանակ, հաղորդագրությունները ցույց են տալիս, որ ընդդիմության՝ միասնական թեկնածուի հարցում անկարողությունը կարող է նկատելիորեն թուլացնել նրա դիրքերը և Էրդողանին հաղթելու լրացուցիչ հնարավորություններ տալ: